Nga 2017 deri më 2024, të gjitha partitë shqiptare bashkëqeverisën me BDI-në

Nga viti 2017 deri në vitin 2024, pothuajse të gjitha subjektet politike shqiptare që sot përbëjnë koalicionin VLEN kanë qenë pjesë e qeverive bashkë me BDI-në, në periudha të ndryshme dhe me role të rëndësishme në ekzekutiv.

Qeveria e vitit 2017, e udhëhequr nga Zoran Zaev dhe LSDM, u formua me mbështetjen e BDI-së, Aleancës për Shqiptarët që drejtohej nga Ziadin Sela dhe Alternativës së Afrim Gashit, kjo e fundit atëherë në kuadër të koalicionit me ASH-në. Në atë periudhë, figurat që sot janë pjesë e VLEN-it ishin pjesë aktive e shumicës parlamentare dhe ekzekutive.

Edhe pas zgjedhjeve të vitit 2020, qeveria u formua sërish nga LSDM dhe BDI, ndërsa pjesë e saj u bënë Lëvizja Besa e Bilall Kasamit dhe, më vonë, Alternativa. Në vitin 2023, në qeveri hyri edhe Aleanca për Shqiptarët që drejtohej nga Arben Taravari. Kështu, deri në ndryshimin e pushtetit në vitin 2024, pothuajse të gjitha partitë që sot janë të bashkuara në VLEN kishin qenë pjesë e qeverisjes me BDI-në.

Një nga figurat kyçe të kësaj periudhe është edhe Izet Mexhiti, sot pjesë e VLEN-it dhe lider i Lëvizjes Demokratike, i cili për vite me radhë mbajti postin e nënkryetarit të BDI-së dhe ishte një nga eksponentët më të rëndësishëm të partisë së Ali Ahmetit deri në shkëputjen nga partia amë.

Kjo hap një debat politik që po bëhet gjithnjë e më i zëshëm në opinion: kush duhet të japë llogari për qeverisjen e viteve 2017–2024? Vetëm BDI-ja, apo edhe partitë dhe figurat politike që sot paraqiten si “ndryshim”, por që për vite me radhë ishin pjesë e të njëjtit pushtet?

Kritikët e VLEN-it theksojnë se shumë nga problemet për të cilat sot akuzohet BDI-ja — nga keqqeverisja, klientelizmi, politizimi institucional e deri te stagnimi në disa procese — kanë ndodhur në periudhën kur partitë që sot janë pjesë e VLEN-it ishin në shumicën qeveritare dhe mbanin poste ministrore, drejtori apo funksione të tjera shtetërore.

Nga ana tjetër, eksponentët e VLEN-it përpiqen të krijojnë dallim mes tyre dhe BDI-së, duke argumentuar se largimi nga partia e Ali Ahmetit dhe krijimi i subjekteve të reja ishte pikërisht rezultat i pakënaqësive.

Megjithatë, faktet politike mbeten të qarta: nga viti 2017 deri në vitin 2024, pothuajse të gjitha partitë që sot përbëjnë VLEN-in kanë bashkëqeverisur me BDI-në, ndërsa shumë nga figurat e tyre kryesore kanë qenë pjesë direkte e strukturave të pushtetit në atë periudhë. Gazeta Flaka