Nga Brukseli në Tuz: Osmani vlerësohet për ndërkombëtarizimin e çështjes shqiptare

Kur debati për të drejtat e shqiptarëve në Maqedoninë e Veriut po zhvendoset gjithnjë e më shumë edhe në adresat ndërkombëtare, një vlerësim i ri për ish-ministrin e Jashtëm, Bujar Osmani, ka ardhur nga shqiptarët në Mal të Zi.

Forumi Shqiptar e ka ftuar Osmanin të ligjërojë në javën e dytë të Akademisë Politike që organizon kjo forcë politike, duke e cilësuar atë si një personalitet me përvojë të spikatur në diplomaci, qeverisje dhe procese eurointegruese. Në njoftimin e tyre, theksohet roli që ai ka luajtur në forcimin e bashkëpunimit rajonal dhe në ndërtimin e urave me partnerët ndërkombëtarë.

Ftesa nuk vjen rastësisht. Gjatë muajve të fundit, Osmani ka qenë ndër politikanët më aktivë shqiptarë në kontaktet me institucionet evropiane, duke zhvilluar takime në Brussels me eurodeputetë, diplomatë dhe zyrtarë të Bashkimit Evropian. Në fokus të këtyre angazhimeve ka qenë pozita e shqiptarëve në Maqedoninë e Veriut dhe sfidat që lidhen me zbatimin e të drejtave të tyre.

Kjo përpjekje diplomatike mori jehonë edhe në raportin e fundit të European Parliament për Maqedoninë e Veriut, ku u përfshi kërkesa për zgjidhjen e çështjes së përdorimit të gjuhës shqipe në provimet shtetërore, si dhe thirrja që protestat e studentëve shqiptarë të mos etiketohen si të motivuara politikisht apo si faktor destabilizues.

Për shumë vëzhgues, ftesa e Forumit Shqiptar është më shumë sesa një angazhim akademik. Ajo interpretohet si njohje e rolit të Osmanit në sjelljen e çështjeve shqiptare nga debati i brendshëm politik drejt tryezave evropiane. Nga Brukseli deri në Tuz, mesazhi duket i qartë: temat që prekin shqiptarët në Maqedoninë e Veriut po fitojnë gjithnjë e më shumë vëmendje përtej kufijve të vendit. Gazeta Flaka