Ofertë 65 milionëshe për Raphinha, ‘asisti’ i merkatos verore për Barcelonën

Barcelona vazhdon të punojë për të forcuar sulmin e saj, duke qenë se klubi konsideron se është e nevojshme të përmirësohet pozita e krahut të majtë me Nico Williams (22 vjeç). Në listën e dëshirave është edhe Dani Olmo (26 vjeç). Megjithatë, ndërsa klubi punon për të marrë shërbimet e dy ndërkombëtarëve spanjollë, asnjë nga sulmuesit e tjerë në skuadër nuk dëshiron të largohet.

Barça vlerëson shumë njërin prej tyre, Raphinha, për konkurrencën dhe performancën e tij të mirë. Imazhi i mirë që braziliani dha ndaj PSG-së dhe uria që tregon gjithmonë e bëjnë një nga lojtarët e Barçës me më shumë kërkesa në merkato.

Dëshmi e mirë për këtë është se, siç mësoi “Mundo Deportivo”, një ofertë shumë e fuqishme nga Arabia Saudite për Raphinha ka mbërritur në zyrat e klubit të Barçës, 65 milionë euro. Një shumë që Barça e konsideron disi të ulët për çmimin e brazilianit, por duke qenë se ai ka qenë tashmë te Barça për dy sezone dhe kushtoi 58 milionë fikse, plus 7 milionë bonuse, do të linte përfitime në arkat blaugrana dhe do të ishte injeksion i rëndësishëm i drejtpërdrejtë për merkaton e kësaj vere.

Al Hilal saudit ka qenë i interesuar për Raphinha, duke “hetuar” Barçën për qëllimet e saj në lidhje me sulmuesin brazilian. Edhe vetë Jorge Jesús, trajneri i skuadrës saudite, mori telefonin dhe u interesua për opsionet e nënshkrimit të tij. Nga Barça iu tha se nuk kishte asnjë qëllim ta shisnin, sepse nisur nga ajo që jep për skuadrën vlerësohet shumë. Megjithatë, nëse Al Hilal arrin ta bindë Raphinha dhe gjithashtu të bëjë një ofertë të fuqishme (rreth 90 milionë euro), klubi katalanas do të hynte në negociata.

Deri më sot, mendimi i anësorit brazilian nuk ka ndryshuar, por Barcelona i ka relaksuar disi kërkesat financiare. Klubi blaugrana e di që, nëse do të nënshkruajë me Nico Williams dhe Dani Olmo, duhet të gjenerojnë para në shitje. Për momentin, Barça ka marrë përmes largimeve të lojtarëve 9 milionë euro nga transferimi i Chadi Riad te Crystal Palace dhe 6 milionë nga kalimi i Marc Guiu te Chelsea.

Përveç ofertës saudite që Barça ka marrë për Raphinha, mediat angleze e lidhin atë me Arsenalin. Sipas “Mirror”, klubi i “Topçinjve” do të ishte gati të ofronte 42 milionë paund, rreth 50 milionë euro. Arsenali, tashmë ka luftuar së bashku me Chelsea për ta marrë brazilianin qysh verën kur Barça nënshkroi me të, në vitin 2022.