Osmani: Edhe Parlamenti Evropian u çua në këmbë për provimin e jurisprudencës në gjuhën shqipe

Ish-ministri i Punëve të Jashtme, Bujar Osmani, ka reaguar pas miratimit të një amendamenti në Parlamentin Evropian që i referohet përdorimit të gjuhës shqipe në provimet shtetërore në Maqedoninë e Veriut.

Përmes një reagimi publik, Osmani tha se edhe Parlamenti Evropian është rreshtuar në mbështetje të kërkesës për zgjidhjen e kësaj çështjeje, duke kërkuar nga autoritetet shtetërore të veprojnë pa vonesë.

“Edhe Parlamenti Europian u çua në këmbë”, ka shkruar Osmani.

Sipas tij, Parlamenti Evropian ka miratuar një amendament me të cilin u kërkohet institucioneve të Maqedonisë së Veriut të sigurojnë zbatimin praktik të Marrëveshjes Kornizë të Ohrit në raport me përdorimin e gjuhës shqipe në provimet shtetërore.

“Parlamenti Europian aprovon amendamentin: Nxit autoritetet e Maqedonisë së Veriut që sa më shpejt të zgjidhin çështjen e përdorimit të gjuhës shqipe në provimet shtetërore, me qëllim që të sigurohet zbatimi praktik i Marrëveshjes Kornizë të Ohrit, si në aspektin ligjor ashtu edhe në frymën e saj, si dhe të përmbahen nga paraqitja e protestave studentore në mënyrë të pasinqertë si të motivuara politikisht ose si faktor destabilizues”, ka cituar Osmani.

Ky amendament vjen në kohën kur debati për mundësinë e dhënies së provimit shtetëror të jurisprudencës në gjuhën shqipe ka shkaktuar reagime të shumta në opinion dhe protesta nga studentët shqiptarë, të cilët kërkojnë respektimin e të drejtave të garantuara me ligj dhe me Marrëveshjen Kornizë të Ohrit. Gazeta Flaka