Osmani godet VLEN-in: Sa më shumë lëvizin, aq më thellë fundosen

Bujar Osmani nga BDI, ka reaguar ashpër ndaj propozimeve të fundit që lidhen me provimin e jurisprudencës dhe ligjin për përfaqësim të drejtë, duke akuzuar koalicionin VLEN se po thellon krizën politike dhe përfaqësuese me qasjet e tij.

Në një reagim publik, Osmani i cilësoi si “propozime të turpshme” zgjidhjet e ofruara për këto çështje, duke përdorur metaforën se VLEN ndodhet “në zall të gjallë”.

“Me propozimet e turpshme si ai për provimin e jurisprudencës dhe ligjit të përfaqësimit të drejtë, VLEN-i është si në zall të gjallë. Sa më shumë lëvizin, aq më thellë fundosen”, deklaroi Osmani.

Ai tha se përpjekjet për të justifikuar, sipas tij, vendime të gabuara vetëm sa po rrisin pasojat politike dhe shoqërore.

“Sa më shumë përpiqen ta arsyetojnë të paarsyetueshmen, aq më i madh bëhet dëmi”, shtoi ai.

Osmani u bëri thirrje përfaqësuesve të VLEN-it që të ndalojnë, siç tha, përshkallëzimin e situatës dhe të përpiqen të minimizojnë pasojat.

“Ndaluni. Mos lëvizni më. Tentoni të dilni nga aty me sa më pak pasoja, sepse dëmi që po shkaktoni është duke lënë pasoja që brezat e ardhshëm do ta kenë të vështirë t’i korrigjojnë”, theksoi Osmani.

Deklaratat e tij vijnë në kohën kur debati për gjuhën shqipe në provimin e jurisprudencës dhe përfaqësimin e drejtë vazhdon të dominojë diskursin politik shqiptar në vend. Gazeta Flaka