Osmani reagon për tabelën në Tabanoc: “Po hiqet prania jonë nga dyert e shtetit”

Ish-ministri i Punëve të Jashtme dhe nënkryetari i BDI-së, Bujar Osmani, ka reaguar pasi në pikën kufitare në Tabanoc është vendosur një tabelë shtetërore ku mungon mbishkrimi në gjuhën shqipe.

Përmes një postimi në rrjetet sociale, Osmani tha se është i dëshpëruar dhe i shqetësuar, duke theksuar se gjuha shqipe nuk i përket asnjë partie politike, por është pjesë e identitetit të shqiptarëve në Maqedoninë e Veriut.

“Sot, pa fije shqetësimi, u vendosën tabela shtetërore pa gjuhën shqipe në Tabanoc. Ndoshta dikush mendon se po e shoh këtë si mundësi për opozitarizëm. Sinqerisht, sot nuk kam as vullnet e as dëshirë për politikë. Jam jashtëzakonisht i dëshpëruar dhe i shqetësuar”, shkruan Osmani.

Ai shton se gjuha shqipe është dëshmi se shqiptarët i përkasin këtij shteti dhe se shteti u përket edhe atyre.

“Gjuha shqipe nuk është e një partie. Është e jona. Është ajo që na tregon se edhe ne i përkasim këtij shteti, se edhe ky shtet është i yni”, thekson Osmani.

Në reagimin e tij, ai u bën thirrje edhe mbështetësve të VLEN-it, por edhe qytetarëve maqedonas, që të mos heshtin për këtë çështje.

“Po ju drejtohem edhe juve që e keni mbështetur VLEN-in. Po ju drejtohem edhe miqve të mi maqedonas që po heshtin. Sot po hiqet prania jonë nga dyert e shtetit. A do ta normalizojmë këtë marrëzi?”, përfundon Osmani. Gazeta Flaka