Osmani: Sot emrat, nesër gjuha shqipe – Selimi: Marshi në Tetovë, test i reagimit qytetar – jo protestë partiake

Ish-ministri i Punëve të Jashtme dhe zëvendëskryetari i BDI-së. Bujar Osmani, ka bërë thirrje për pjesëmarrje në marshin e paralajmëruar në Tetovë, duke e lidhur vendimin e fundit të Gjykatës Kushtetuese për emrat e rrugëve me, sipas tij, rrezikun e cenimit të të drejtave të tjera të shqiptarëve.

“Kur thyhet xhami i parë dhe askush nuk reagon, nuk ndalet aty. Pastaj thyhet i dyti, i treti, derisa e gjithë shtëpia mbetet pa mbrojtje. Sot xhami i parë janë emrat shqiptarë që i anuloi Gjykata Kushtetuese. Nesër, siç paralajmëroi me arrogancë Konstadinovski, do të jetë gjuha shqipe. Prandaj marshimi sot nuk është vetëm për emrat e rrugëve, është për ta ndalur dorën para se të thyejë xhamin e radhës”, ka deklaruar Osmani.

Edhe analisti Sefer Selimi e ka komentuar deklaratën e kryetarit të Gjykata Kushtetuese e Republikës së Maqedonisë së Veriut, Darko Kostadinovski, të dhënë në një intervistë për Sitel.

Sipas Selimit, deklarata e Kostadinovskit se: “Do t’i pëlqejë dikujt apo jo, Ligji për gjuhët do të zgjidhet”, nuk ishte “thjesht një deklaratë arrogante”, por “një paralajmërim i qartë se vendimi është parapërcaktuar dhe një sfidim publik në stilin: unë misionin do ta kryej, ndërsa ju nuk keni çfarë të bëni përveçse ta pranoni”.

Ai shtoi se, për këtë arsye, marshi në Tetovë “nuk është një protestë e zakonshme e thirrur nga një parti politike, por një test i reagimit qytetar përballë një tendence për zhbërjen e të drejtave të arritura dhe përdhosjen e dinjitetit të një populli të tërë”.

“Tetova duhet të jetë vendi ku secili që ka sadopak ndërgjegje kombëtare e qytetare e ngre zërin, pavarësisht bindjeve apo përkatësisë partiake”, ka përfunduar Selimi. Gazeta Flaka