Pas lajmit në Flaka, reagon ASH-ja: Emërimi i babait të Mimoza Musës është nepotizëm

Aleanca për Shqiptarët, e udhëhequr nga Arben Taravari, ka reaguar ndaj emërimit të Arif Musës, babait të deputetes dhe nënkryetares së VLEN-it, Mimoza Musa, si anëtar i Këshillit Mbikëqyrës të Bankës Zhvillimore të Maqedonisë së Veriut, duke e cilësuar rastin si shembull të nepotizmit.

Në reagimin e saj, ASH-ja rikujton se Mimoza Musa mandatin e deputetes e fitoi “me votat, besimin dhe mbështetjen organizative të strukturave të Aleancës për Shqiptarët”.

“Kur vendosi ta braktisë Aleancën dhe të mbetet pjesë e VLEN-it, u arsyetua se dëshironte ta vazhdonte betejën kundër nepotizmit, krimit dhe korrupsionit. Sot po e shohim se si e zhvillon këtë ‘betejë’”, thuhet në reagim.

Sipas ASH-së, babai i deputetes, tashmë pensionist, është emëruar në një institucion shtetëror që, sipas tyre, “duhet të menaxhohet mbi bazën e meritës, profesionalizmit dhe përgjegjësisë publike”.

“Në publik flasin për meritokraci, ndërsa në pushtet sistemojnë familjarët. Nëpër studio televizive luftojnë nepotizmin, ndërsa në institucionet shtetërore emërojnë baballarët e tyre”, thuhet më tej.

Aleanca për Shqiptarët vlerëson se ky rast “nuk është luftë kundër nepotizmit”, por “nepotizëm i pastër, i mbështjellë me fjalime për moral dhe ndryshim”.

Partia kërkon që Mimoza Musa të sqarojë rrethanat e emërimit.

“Mimoza Musa duhet të tregojë se kush e propozoi babain e saj, mbi çfarë kriteresh është bërë emërimi dhe si ndodhi që, mes mijëra ekonomistëve dhe profesionistëve të rinj, zgjedhja ra pikërisht mbi familjarin e një nënkryetareje të VLEN-it”, thuhet në reagim.

Në fund, ASH-ja akuzon VLEN-in se ka përdorur pushtetin për interesa familjare.

“Ndërsa të rinjtë presin një mundësi ose largohen nga vendi, VLEN-i kujdeset që familjarëve të funksionarëve të mos u mungojë asnjë pozitë. Mandati i fituar nga Aleanca u përdor për të mbetur në pushtet. Pushteti tani po përdoret për të rehatuar familjen. Ja sa vlejnë premtimet e VLEN-it kundër nepotizmit”, përfundon reagimi. Gazeta Flaka