Pas një karriere të artë, Azpilicueta jep sinjale për pensionim

Një kapitull i rëndësishëm në karrierën e mbrojtësit legjendar spanjoll, César Azpilicueta, po i vjen fundi. Në një konferencë për shtyp të mbajtur sot, ai njoftoi se do të largohet nga Atletico Madridi pas përfundimit të Kupës së Botës për Klube, duke i dhënë fund aventurës së tij me skuadrën nga kryeqyteti spanjoll.

“Shpresoj që kjo ndarje të përmbyllet me sukses. Të largohem me një trofe do të ishte mënyra më e lumtur për ta mbyllur”, u shpreh Azpilicueta me emocion, duke lënë të kuptohet se ky mund të jetë fundi jo vetëm i qëndrimit të tij në Madrid, por ndoshta edhe i karrierës së tij si futbollist profesionist.

Azpilicueta, 35 vjeç, iu bashkua Atletico Madridit në verën e vitit 2023 pas një karriere të lavdishme te Chelsea, ku fitoi gjithçka – nga Premier League, FA Cup, Liga e Kampionëve, deri te Kupa e Botës për Klube. Me përvojën e tij të pasur dhe profesionalizmin shembullor, ai ka qenë një nga figurat kyçe në dhomën e zhveshjes së Atleticos, pavarësisht se nuk ishte gjithmonë titullar i padiskutueshëm në fushë.

Ende nuk ka një konfirmim zyrtar nëse Azpilicueta do të pensionohet nga futbolli pas këtij turneu, por shumë burime afër lojtarit raportojnë se kjo është shumë e mundshme. Kjo do të përbënte mbylljen e një karriere brilante që ka zgjatur mbi dy dekada, me kontribut në nivelet më të larta të futbollit evropian.

Tifozët e Atleticos shpresojnë që ndarja me të të ndodhë në mënyrën më të denjë – me një trofe në dorë, si përmbyllje simbolike e një rruge të lavdishme në futbollin elitar.

Flaka