Për 400 euro do të përballen me zjarret, Miteva: Do të punësohen 400 zjarrfikës – Janë joprofesionistë!

– Në një konferencë për shtyp sot, zëdhënësja e Qeverisë, Maria Miteva, njoftoi nisjen e një mase të re për punësim me fokus në mbrojtjen dhe parandalimin e zjarreve në Maqedoninë e Veriut.

“Ky është një program që zbatohet për herë të parë në shtetin tonë,” tha Miteva, duke shpjeguar se me këtë masë Qeveria bën një hap të rëndësishëm nga politika reaktive drejt asaj proaktive në fushën e mbrojtjes nga zjarret dhe ruajtjes së mjedisit jetësor.

Masa parashikon punësimin e 400 personave të papunë në punë publike, kryesisht në krijimin e brezave kundërzjarrit dhe aktivitete të tjera për parandalimin dhe uljen e rrezikut nga zjarret.

“Çdo pjesëmarrës do të marrë mbështetje financiare mujore prej 24.000 denarësh,” theksoi Miteva. Ajo shtoi se personat më të përkushtuar dhe me gatishmëri të lartë do të kenë mundësi punësimi të përhershëm në institucionet kompetente pas përfundimit të programit.

Zëdhënësja theksoi se kjo masë ka një efekt të dyfishtë social dhe ekologjik: “Sigurojmë të ardhura dhe përfshirje për personat e papunë, ndërsa ndërtojmë një sistem funksional dhe të qëndrueshëm për mbrojtje nga zjarret në 14 komuna, aty ku ekzistojnë njësi territoriale zjarrfikësish.”

Aplikimet do të bëhen në mënyrë transparente përmes Thirrjeve Publike që do të shpallen nga vetëqeverisjet lokale.

“Lufta kundër zjarreve është përgjegjësi që e ndajmë – nga niveli qendror deri te ai lokal,” theksoi Maria Miteva, duke ftuar qytetarët e motivuar të aplikojnë dhe të kontribuojnë në këtë mision të përbashkët.

Miteva përfundoi: “Çdo rrugë e pastruar, çdo jetë njerëzore e shpëtuar – do të jetë dëshmi se kjo masë bën ndryshim.”