Raporti amerikan për Ballkanin, Osmani: Rusia përdor ndarjet etnike si armë politike

Bujar Osmani ka reaguar lidhur me raportin më të ri të Departamentit Amerikan të Shtetit drejtuar Kongresit për politikën amerikane në Ballkanin Perëndimor, duke theksuar se dokumenti konfirmon rrezikun që paraqet ndikimi rus në rajon përmes shfrytëzimit të tensioneve etnike dhe ndarjeve shoqërore, shkruan Gazeta Flaka

Në reagimin e tij, Osmani vlerëson se raporti “e identifikon saktë” mënyrën se si Russia Rusia përdor pakënaqësitë etnike dhe polarizimin politik si instrument destabilizimi në Ballkanin Perëndimor.

Sipas tij, përvoja e Maqedonisë së Veriut është shembull i rëndësishëm për rajonin, sepse Marrëveshja e Ohrit nuk i dha fund vetëm konfliktit të vitit 2001, por krijoi bazën për kohezion ndëretnik dhe stabilitet institucional.

“Marrëveshja e Ohrit bëri më shumë sesa t’i japë fund një lufte, ajo ndërtoi kohezion ndëretnik që u shndërrua në mburojë kundër politikave të përçarjes dhe ndihmoi në ruajtjen e rrugës sonë euroatlantike”, deklaroi Osmani.

Ai paralajmëroi se dobësimi i kësaj “mburoje ndëretnike” krijon hapësira për ndikime të huaja destabilizuese:
“Dobësimi i kësaj mburoje krijon hapësira që të tjerët dinë t’i shfrytëzojnë.”

Raportet dhe analizat amerikane e evropiane prej kohësh paralajmërojnë se Moska synon të pengojë integrimin euroatlantik të Ballkanit Perëndimor duke shfrytëzuar tensionet politike, etnike dhe institucionale. Një analizë e fundit e publikuar në Evropë thekson se Rusia “vazhdon të shfrytëzojë ndarjet dhe vulnerabilitetet në rajon” për interesa strategjike dhe për të penguar zgjerimin e NATO-s dhe Bashkimit Evropian.

Po ashtu, dokumente dhe analiza ndërkombëtare rikujtojnë se Marrëveshja e Ohrit konsiderohet themeli kryesor që ruajti karakterin multietnik të shtetit dhe stabilitetin e vendit pas konfliktit të vitit 2001.

Komentet e Osmanit vijnë në një moment kur në rajon është rikthyer debati për ndikimin rus, luftën hibride dhe shfrytëzimin e krizave politike e etnike në Ballkanin Perëndimor. Në analizat e fundit ndërkombëtare theksohet se vakumi politik, frustrimi nga ngadalësimi i integrimit evropian dhe polarizimi i brendshëm krijojnë terren të favorshëm për ndikime destabilizuese nga aktorë të jashtëm. Gazeta Flaka