Rikonstruimi në finish: Mickoski zbulon afatin, Kasami paralajmëron gjashtë ministri për VLEN-in

Rikonstruimi i Qeverisë hyn në fazën përfundimtare, ndërsa javën e ardhshme pritet të bëhen publike emrat e rinj dhe ndarja e resorëve mes partnerëve të koalicionit. Kryeministri Hristijan Mickoski njoftoi se pas mbledhjes së Komitetit Ekzekutiv të VMRO-DPMNE, të planifikuar për të martën, do të prezantohet paketa e ndryshimeve në kabinetin qeveritar.

Në një intervistë për RTVM, Mickoski tha se rikonstruimi nuk lidhet vetëm me performancën e ministrave, por edhe me nevojën për t’iu përshtatur prioriteteve të reja të partnerëve të koalicionit. Sipas tij, ndryshimet do të përfshijnë harmonizimin e portofoleve me objektivat e reja politike, ndërsa ende nuk është vendosur sa i madh do të jetë rikonstruimi.

“Ndryshimet nuk bëhen vetëm për shkak të rezultateve. Prioritetet ndryshojnë dhe qeveria duhet të përshtatet me to”, deklaroi Mickoski, duke shtuar se emrat e ministrave dhe resorët do të bëhen publikë vetëm pasi të përfundojnë procedurat partiake.

Nga ana tjetër, bashkëkryetari i VLEN, Bilall Kasami, tha se marrëveshja për riformatimin e Qeverisë është drejt finalizimit dhe se koalicioni shqiptar do të dalë më i fuqizuar nga ky proces.

Sipas Kasamit, VLEN pritet të udhëheqë gjashtë ministri, ndërsa në tavolinën e negociatave mbetet edhe mundësia që këtij koalicioni t’i besohet drejtimi i Ministrisë së Kulturës.

“Po e përforcojmë pozicionin tonë në Qeveri. Këto janë dikastere që ndikojnë drejtpërdrejt në avancimin e të drejtave të shqiptarëve dhe do të kemi një rol më të rëndësishëm se më parë”, deklaroi Kasami.

Ai shtoi se kritikat e opozitës janë të pritshme, por vlerësoi se marrëveshja e re do t’i japë VLEN-it më shumë përgjegjësi dhe ndikim në ekzekutiv, veçanërisht në resorët që lidhen me të drejtat e komuniteteve dhe politikat kulturore.

Ndërkohë, Mickoski u shpreh optimist se përbërja e re qeveritare do ta sigurojë mbështetjen parlamentare dhe do të vazhdojë mandatin me fokus në realizimin e programit qeverisës dhe prioriteteve të reja të koalicionit. Gazeta Flaka