Skandal i ri me insulinën? BDI pretendon se kompania serbe ka fituar mbi 50 tenderë publikë | VIDEO
Zëdhënësja dhe nënkryetarja e BDI-së, Arta Bilalli Zendeli, ka ngritur çështjen e kontrollit mbi sektorin farmaceutik, duke paralajmëruar për rreziqet që, sipas saj, mund të sjellë përqendrimi i pronësisë së kompanive që furnizojnë institucionet shëndetësore.
Ajo e vendosi këtë çështje në vazhdën e hyrjes së kapitalit serb në sektorin bankar dhe atë të telekomunikacionit, duke pretenduar se tashmë edhe furnizimi me ilaçe po bëhet pjesë e këtij procesi.
„Jo vetëm sistemi bankar, por edhe insulina i jepet në duar botës serbe“, deklaroi Bilalli Zendeli.
Sipas saj, më 3 prill 2025, Komisioni për Mbrojtjen e Konkurrencës miratoi, me vendimin nr. 08-55, blerjen e Phoenix Pharma nga kompania serbe VEGA, të cilën ajo e lidh me biznesmenin Dejan Çakajac dhe kompaninë e lojërave të fatit Mozzart.
Bilalli Zendeli pretendon se gjatë vitit 2026, Vega Pharmaceuticals ka fituar mbi 50 kontrata publike në Ministrinë e Shëndetësisë dhe në klinika të ndryshme, ndërsa vlera e kontratave për furnizimin me insulinë, sipas saj, arrin rreth 10 milionë euro.
Përfaqësuesja e BDI-së thotë se çështja nuk duhet parë vetëm nga aspekti i biznesit, por edhe nga ai i sigurisë shëndetësore, pasi insulina është ilaç jetik për mijëra pacientë.
„Insulina nuk është biznes i zakonshëm. Është ilaç jetik dhe furnizimi me të është çështje e sigurisë shëndetësore të shtetit“, theksoi ajo.
Në këtë kontekst, Bilalli Zendeli kërkoi përgjigje se kush e ka vlerësuar rrezikun për sigurinë e furnizimit me insulinë dhe mbi çfarë baze Komisioni për Mbrojtjen e Konkurrencës e ka miratuar transaksionin.
Ajo ngriti gjithashtu pikëpyetje për mundësinë e ndikimit politik në vendimmarrje dhe për njohuritë që, sipas saj, ka pasur anëtari i Komisionit, Valon Elezi.
BDI kërkon publikimin e analizës së plotë që ka paraprirë miratimin e transaksionit, si dhe të gjitha kontratave për furnizimin me insulinë për periudhën 2025–2027.
„Bankat kanë të bëjnë me paratë tona. Telekomunikacioni me komunikimet tona. Por insulina ka të bëjë me jetën e njerëzve. Me jetën e qytetarëve nuk guxon të luajë askush“, përfundoi Bilalli Zendeli.
Çështja tashmë ngre disa pyetje që kërkojnë përgjigje institucionale: cilat janë kushtet e furnizimit me insulinë, sa është përqendrimi i tregut dhe çfarë mekanizmash ekzistojnë për të garantuar vazhdimësinë e furnizimit në rast të problemeve me kompaninë furnizuese.
Pretendimet për pronësinë, vlerën e kontratave dhe rrezikun e mundshëm për furnizimin janë deklarime të përfaqësueses së BDI-së dhe kërkojnë verifikim nga institucionet përkatëse. Flaka














