Skandal në Qeveri: Bogojevski dëmton mbishkrimin, siguria nuk ndërhyn

Petar Bogojevski ka publikuar një fotografi ku shihet duke dëmtuar mbishkrimin “Republika e Maqedonisë së Veriut” në objektin e Qeverisë, duke e shoqëruar me një mesazh kundër përdorimit të emrit kushtetues në komunikimin e brendshëm shtetëror.

Në deklaratën e tij, Bogojevski thotë se Marrëveshja e Prespës duhet të respektohet, por pretendon se përdorimi i emrit “Maqedonia e Veriut” brenda vendit lidhet me procesin e negociatave dhe anëtarësimit në Bashkimin Evropian.

“Nëse nuk ka negociata dhe nuk ka BE, atëherë nuk ka as ‘Veriut’,” shkruan ai në mesazhin e publikuar, duke kundërshtuar përdorimin e emrit kushtetues në përdorim të brendshëm.

Në fotografinë e publikuar shihen gjithashtu dy pjesëtarë të organeve të rendit në hyrje të Qeverisë, të cilët nuk ndërhyjnë gjatë veprimit të tij, gjë që ka nxitur reagime dhe pyetje në opinion publik për mënyrën e reagimit të sigurisë institucionale.

Ngjarja ka hapur debat politik mbi atë nëse veprimi ka qenë i toleruar apo i koordinuar në mënyrë indirekte, duke marrë parasysh faktin se Bogojevski është pjesë e koalicionit qeverisës në nivel qendror dhe raportet e tij me kryeministrin Hristijan Mickoski.

Deri tani nuk ka reagim zyrtar që konfirmon apo hedh poshtë ndonjë “miratim” institucional për veprimin, ndërsa mbetet e paqartë nëse institucionet e sigurisë do të ndërmarrin masa lidhur me incidentin apo do ta trajtojnë si deklarim politik individual.

Debati publik është zhvendosur tashmë në dy drejtime: respektimi i Marrëveshjes së Prespës dhe funksionimi i organeve të rendit në situata ku përfshihen figura politike. Gazeta Flaka