Studentët shqiptarë prezantohen në Itali me konferencë ndërkombëtare

Përfaqësuesi i Lëvizjes Studentore, Mumin Osmani, ka njoftuar pjesëmarrjen e tij në një konferencë të mbajtur në Itali, ku janë trajtuar tema mbi çështjet shqiptare, gjuhën, historinë dhe të drejtat e shqiptarëve në Maqedoninë e Veriut.

Osmani tha se pjesëmarrja në këtë ngjarje është bërë me mbështetjen e Lëvizjes Studentore, stafit akademik dhe profesorëve.

Ai u shpreh:

“Shpreh mirënjohjen time për besimin e dhënë nga Lëvizja Studentore, si dhe nga stafi akademik dhe profesorët, për mundësinë që të jem pjesë e kësaj konference të rëndësishme.”

Gjatë konferencës, sipas tij, janë trajtuar disa tema akademike dhe shoqërore nga profesorë dhe studiues të ndryshëm, përfshirë marrëdhëniet e shqiptarëve në Maqedoninë e Veriut, gjuhën shqipe dhe vazhdimësinë historike shqiptare.

Osmani prezantoi gjithashtu temën:

“Kërkesat dhe sfidat studentore në Republikën e Maqedonisë së Veriut.”

Ai falënderoi organizatorët dhe pjesëmarrësit, duke veçuar Dr. Granit Muçajn dhe pjesëmarrjen e eurodeputetit të Parlamentit Evropian, Alessandro Ciriani.

Ndërkohë, aktivisti Mevlan Ademi theksoi se Lëvizja Studentore u përfaqësua në këtë aktivitet në Itali dhe vlerësoi mbështetjen e diasporës shqiptare.

“Gjatë kësaj konference patëm nderin të dëgjohemi edhe nga eurodeputeti Alessandro Ciriani, të cilin e falënderojmë për vëmendjen dhe gatishmërinë për të dëgjuar zërin tonë.”

Sipas Ademit, mbështetja e bashkatdhetarëve mbetet motivim për vazhdimin e aktiviteteve studentore dhe përfaqësimit ndërkombëtar. Gazeta Flaka