Tajia Diamonds krijon gjerdanin e personalizuar për Lamine Yamal

Ylli i Barcelonës, Lamine Yamal, po shijon një verë të mbushur me luks dhe vëmendje mediatike, duke u konfirmuar si një prej figurave më të ndjekura të futbollit botëror – jo vetëm për talentin e tij në fushë, por edhe për stilin jashtë saj.

17-vjeçari ka qenë në një turne veror që përfshiu ishujt Balearik, një vizitë në Brazil ku qëndroi me idhullin e tij Neymar Junior, dhe një ndalesë në Shangai për një aktivitet promocional me Adidas. Destinacioni i fundit para rikthimit në Barcelonë është New York-u, ku ai ka marrë një dhuratë që ka bërë bujë në rrjetet sociale.

Sipas raportimeve nga BeIN Sports dhe Mundo Deportivo, Lamine Yamal ka marrë një gjerdan të personalizuar, të mbuluar me diamante dhe gurë të çmuar, me inicialet e tij “LY”. Dhurata, me vlerë rreth 400 mijë dollarë (342 mijë euro), iu dorëzua nga këngëtari dominikan El Alfa, i cili e publikoi me mbishkrimin:

“Pjesa më e mirë për futbollistin më të mirë në botë.”

Gjerdani është dizajnuar nga Victor Rodriguez, themeluesi i Tajia Diamonds, një prej argjendarive më prestigjioze në New York, e njohur për bashkëpunimet me figura të njohura të muzikës dhe sportit.

Ky gjest vjen në një moment kur Yamal pritet të firmosë kontratën e re me Barcelonën, që do ta lidhë me klubin deri në vitin 2031 dhe do ta bëjë një nga lojtarët më të paguar të skuadrës. Ai gjithashtu do të marrë fanellën me numrin 10, pas largimit të Ansu Fati.

Rritja e shpejtë e Yamalit si ikonë globale ka bërë që sponsorët dhe të famshmit të vihen në radhë për të bashkëpunuar me të, duke e kthyer në një figurë të padiskutueshme të futbollit modern – si në fushë, ashtu edhe në botën e modës dhe luksit.

Flaka