Takimet vazhdojnë: Osmani alarmon Brukselin, Marrëveshja e Ohrit dhe eurointegrimet në fokus

Nënkryetari i parë i Bashkimit Demokratik për Integrim, Bujar Osmani, ka vijuar agjendën e tij zyrtare në Bruksel me një sërë takimesh me përfaqësues të institucioneve evropiane dhe eurodeputetë të angazhuar në politikat e zgjerimit dhe Ballkanit Perëndimor.

Sipas Osmanit, dita e dytë e vizitës u fokusua në diskutime që kanë të bëjnë me integrimin evropian të Maqedonisë së Veriut, sfidat rajonale dhe nevojën për një angazhim më aktiv të Bashkimit Evropian në rajon.

“Dita e dytë e vizitës në Bruksel vazhdoi me një sërë takimesh me përfaqësues të institucioneve evropiane, mes tyre kabinetin e komisioneres për zgjerim Marta Kos, Andrea Vicher-Waite, si dhe eurodeputetët Vladimir Prebiliç, Tijs Rojten dhe Matjaž Nemec, të angazhuar në politikat e BE-së lidhur me zgjerimin dhe Ballkanin Perëndimor”, ka deklaruar Osmani.

Ai bëri të ditur se në qendër të bisedimeve ishte procesi eurointegrues i vendit dhe zhvillimet e fundit politike që, sipas tij, po ndikojnë në funksionimin e modelit multietnik.

“Theks i veçantë u vendos në krizën me zhbërjen e Marrëveshjes Paqësore të Ohrit si dhe dinamikën e procesit të anëtarësimit”, theksoi Osmani.

Sipas tij, gjatë takimeve është riafirmuar edhe roli i BDI-së si faktor kyç në ruajtjen e kursit euroatlantik të vendit.

“Në këtë kontekst u theksua roli i BDI-së si partner kredibil dhe konstruktiv, me angazhim të vazhdueshëm në drejtim të avancimit të agjendës evropiane dhe ruajtjes së orientimit strategjik të vendit”, u shpreh ai.

Osmani përcolli mesazhin se mbështetja nga Brukseli mbetet e fortë, por se rezultatet konkrete varen nga vendimmarrja politike në vend.

“Mesazhi është i qartë: Maqedonia e Veriut ka mbështetje në Bruksel, por progresi varet nga vullneti politik i brendshëm dhe lidershipi i qartë”, deklaroi nënkryetari i parë i BDI-së.

Në kuadër të vizitës, Osmani zhvilloi edhe një takim të veçantë me deputetin e Parlamentit të Brukselit, Ibrahim Domez, me origjinë nga Manastiri.

“Na bashkoi profesioni si kirurgë dhe angazhimi në politikë, por mbi të gjitha një bindje e përbashkët: Dygjuhësia, si në Belgjikë, ashtu edhe në Maqedoninë e Veriut, nuk është temë për negociim”, ka nënvizuar Osmani. Gazeta Flaka