Taravari vijon me prezantimin e Platformës Kombëtare: Fuqizimi ekonomik i shqiptarëve

Kryetari i Aleancës për Shqiptarët, Arben Taravari, ka prezantuar sot pikën e dytë të Platformës Kombëtare Shqiptare, me fokus te politikat ekonomike dhe fuqizimi i pozitës së shqiptarëve në Maqedoninë e Veriut.

Në një deklaratë për media, Taravari tha se “një ekonomi e fortë dhe e drejtë është shtylla kryesore e zhvillimit kombëtar”, duke theksuar nevojën për mbështetje të bizneseve vendore, investime nga diaspora dhe reforma në administratën publike.

Pikat kyçe të platformës ekonomike përfshijnë:

• Lehtësime fiskale për bizneset e vogla dhe të mesme, me qëllim nxitjen e sipërmarrjes dhe krijimin e vendeve të punës.
• Stimulim të investimeve nga diaspora, përmes kushteve më të favorshme ligjore dhe fiskale.
• Zhvillim rural dhe agroturizëm, për të ringjallur zonat jashtë qendrave urbane dhe për të diversifikuar ekonominë.
• Menaxhim të drejtë të pasurive natyrore, me privatizim të kontrolluar që garanton përfitime për shtetin dhe qytetarët.
• Reforma në administratën publike, me fokus në digjitalizim, ulje të burokracisë dhe rritje të transparencës.

“Po krijojmë rrugën drejt një të ardhmeje më të mirë për çdo shqiptar,” deklaroi Taravari, duke theksuar se zbatimi i këtyre politikave do të konkretizohet përmes programit të ardhshëm politik të partisë.

Aleanca për Shqiptarët bëri thirrje për përkrahje të gjerë qytetare, duke e cilësuar këtë platformë si një orientim të qartë politik, kombëtar dhe konservator. Flaka