Tirana i dërgon sinjal Shkupit: Të drejtat e shqiptarëve dhe rruga drejt BE-së janë të pandashme

Brenda vetëm pak ditësh, Tirana zyrtare ka përcjellë dy mesazhe të njëpasnjëshme ndaj Shkupit, duke e vendosur respektimin e të drejtave të shqiptarëve në qendër të procesit të integrimit evropian të Maqedonia e Veriut.

Në takimin me ambasadorin e sapoakredituar të Shkupit në Tiranë, Vele Trpevski, ministri shqiptar për Evropën dhe Punët e Jashtme, Ferit Hoxha, theksoi se zbatimi i plotë dhe i qëndrueshëm i Ligjit për Përdorimin e Gjuhëve nuk është vetëm një detyrim kushtetues dhe një çështje e barazisë mes qytetarëve, por edhe një tregues i rëndësishëm i përparimit të vendit drejt Bashkimi Evropian.

Sipas Hoxhës, procesi i integrimit nuk matet vetëm me përmbushjen e kritereve teknike, por edhe me respektimin në praktikë të të drejtave të komuniteteve etnike dhe funksionimin real të parimit të barazisë.

Mesazhi u përsërit edhe një ditë më vonë, gjatë takimit të ministrit shqiptar me pjesëmarrësit e Akademisë Politike të Bashkimi Demokratik për Integrim. Në këtë takim, Hoxha nënvizoi rëndësinë e ruajtjes së frymës dhe zbatimit të plotë të Marrëveshja e Ohrit, duke e cilësuar atë si themelin e bashkëjetesës ndëretnike dhe të karakterit multietnik të shtetit.

Ai theksoi se të drejtat e garantuara me Kushtetutë dhe legjislacion duhet jo vetëm të mbrohen, por edhe të avancohen në përputhje me standardet evropiane, ndërsa rikujtoi rolin e shqiptarëve si faktor shtetformues, stabilizues dhe mbështetës të orientimit euroatlantik të vendit.

Dy takimet, ndonëse me audienca të ndryshme, përcollën të njëjtin qëndrim politik të Tiranës: zbatimi efektiv i Ligjit për Përdorimin e Gjuhëve dhe respektimi i frymës së Marrëveshjes së Ohrit mbeten elemente kyçe për demokracinë multietnike të Maqedonisë së Veriut dhe për besueshmërinë e saj në procesin e anëtarësimit në Bashkimin Evropian. Gazeta Flaka