Topi politik te Filkov: debati për provimin e jurisprudencës vazhdon pa zgjidhje

Deklaratat e fundit të kryeministrit Hristijan Mickoski për çështjen e provimit të jurisprudencës në gjuhën shqipe kanë hapur dilema të reja rreth rolit të Ministrisë së Drejtësisë dhe procesit të gjetjes së një zgjidhjeje për kërkesat e studentëve shqiptarë, shkruan Gazeta Flaka

Në një intervistë për Alsat, Mickoski deklaroi se ligji aktual nuk e rregullon drejtpërdrejt mënyrën e organizimit të provimit të jurisprudencës, por ia lë këtë kompetencë ministrit të Drejtësisë përmes një akti tjetër juridik.

“Ligji aktual, në formën që është tani, nuk e rregullon mënyrën e zhvillimit të provimit, por i lë të drejtën ministrit të Drejtësisë që, me një akt tjetër juridik, ta rregullojë mënyrën e dhënies së provimit të jurisprudencës”, deklaroi Mickoski.

I pyetur nëse mungesa e provimit në gjuhën shqipe lidhet me mungesën e bazës ligjore apo me mungesën e vullnetit të ministrit të Drejtësisë, Igor Filkov, kryeministri hodhi përgjegjësinë te qeveritë e kaluara.

“Unë më tepër do të thosha se në vitet e kaluara ministrat shqiptarë nga radhët e BDI-së nuk kanë dashur ta bëjnë këtë, ndërsa kjo qeveri ka vullnet dhe po punon për të gjetur një mënyrë që kjo çështje ose problem të tejkalohet. Kështu që situata është ndryshe dhe ministri Filkov është pjesë e kësaj qeverie që po kërkon zgjidhje”, tha ai.

Megjithatë, këto deklarata duket se nuk përputhen plotësisht me mesazhet e mëhershme të zëvendëskryeministrit të parë, Bekim Sali, i cili pas polemikave publike me ministrin Igor Filkov kishte bërë të ditur se çështja ishte ngritur në nivel të tij dhe të kryeministrit, duke lënë të kuptohet se procesi i vendimmarrjes do të trajtohej jashtë kompetencës së ministrit.

Por deklarata e fundit e Mickoskit se ministri Filkov është pjesë e procesit dhe se pikërisht ministri ka kompetencën ligjore për të rregulluar mënyrën e zhvillimit të provimit, e rikthen sërish në qendër të vëmendjes rolin e Ministrisë së Drejtësisë.

Njëkohësisht, kryeministri konfirmoi se deri më tani nuk ka një zgjidhje përfundimtare dhe se procesi vazhdon brenda institucioneve qeveritare.

“Ajo që ne po bëjmë aktualisht është në kuadër të qeverisë. Natyrisht që do të ketë debat publik. Brenda atij debati publik, sigurisht që edhe studentët që po protestojnë do të marrin pjesë dhe janë të mirëpritur që të japin kontributin e tyre”, deklaroi Mickoski.

Kjo nënkupton se çështja e provimit të jurisprudencës në gjuhën shqipe mbetet ende e hapur, ndërsa deklaratat e fundit kanë nxitur pyetje nëse ekziston një qëndrim i unifikuar brenda koalicionit qeverisës për mënyrën e zgjidhjes së saj.

Ndërkohë, studentët shqiptarë vazhdojnë të kërkojnë mundësinë për ta dhënë provimin në gjuhën amtare, duke insistuar se kjo është çështje e barazisë kushtetuese dhe e respektimit të të drejtave gjuhësore. Gazeta Flaka