VLEN: Investime të reja infrastrukturore në Tearcë – projekti në Dobrosht nis zyrtarisht
Botuar nga Flaka
Zëvendësministrja e Transportit, Kaltrina Zekolli-Shaqiri, së bashku me përfaqësues të komunës dhe institucioneve relevante, kanë inspektuar nga afër nisjen e punimeve për rikonstruktimin e rrugës lokale në fshatin Dobrosht të Komunës së Tearcës.
Sipas VLEN-it, ky projekt dhe investimet e tjera në zonë po sjellin ndryshime të prekshme për qytetarët.
“Nën udhëheqjen energjike dhe përkushtimin e palëkundur të zëvendësministres së Transportit, Kaltrina Zekolli-Shaqiri, investimet në Komunën e Tearcës po marrin hov të fuqishëm, duke u shndërruar në projekte konkrete që preken dhe ndihen nga çdo qytetar”, thuhet në njoftimin e kësaj strukture politike.
Në vizitën në terren morën pjesë edhe kryetari i Komunës së Tearcës, Daut Memishi, si dhe zv/drejtori i Ndërmarrjes Publike për Rrugë Shtetërore, Tahir Tairi, ku u pa nga afër fillimi i punimeve.
VLEN thekson se mbështetja institucionale për komunën është e vazhdueshme dhe e orientuar drejt rezultateve konkrete.
“Mbështetja e Ministrisë së Transportit ndaj Tearcës është e fuqishme, e vazhdueshme dhe plotësisht e orientuar drejt rezultateve”, thuhet më tej në reagim.
Aktualisht, sipas të dhënave të prezantuara, në Komunën e Tearcës janë në realizim 7 projekte infrastrukturore me vlerë rreth 2.1 milionë euro, që përfshijnë rrugë lokale dhe investime në rrjetin e kanalizimit fekal.
Për projektin në Dobrosht, është bërë e ditur se parashikohet rikonstruktimi i 600 metrave rrugë, përfshirë ndërhyrje në infrastrukturën ekzistuese, me një investim prej mbi 13 milionë denarësh.
“Këto projekte nuk janë vetëm investime infrastrukturore, ato janë investime në dinjitetin dhe cilësinë e jetës së qytetarëve”, thekson VLEN.
Në fund, nga kjo strukturë politike u ritheksua se qëllimi mbetet realizimi i premtimeve në terren.
“Me ritëm të lartë pune dhe përkushtim maksimal, Tearca po shndërrohet në një model të zhvillimit të qëndrueshëm dhe të barabartë për të gjithë”, përfundon njoftimi. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
