VLEN prezanton masën e punësimit për vitin 2025

Koalicioni VLEN ka njoftuar lansimin e Masës 2.1 – “Punësim dhe rritje e ndërmarrjeve”, si pjesë e Planit Operativ për Punësim 2024. Sipas VLEN, kjo iniciativë konsiderohet një nga masat më konkrete dhe të fuqishme për nxitjen e punësimeve të reja dhe zhvillimin e ndërmarrjeve lokale në Maqedoninë e Veriut.

Sipas njoftimit të VLEN, qëllimi i masës është i dyfishtë: krijimi i vendeve të reja të punës dhe fuqizimi i bizneseve vendore, duke kontribuar kështu në ndërtimin e një ekonomie më të drejtë, më të fortë dhe më gjithëpërfshirëse.

Kush mund të aplikojë?

Të drejtë aplikimi në këtë masë kanë:

• Ndërmarrjet mikro, të vogla dhe të mesme;
• Organizatat qytetare të interesuara për punësime të reja;
• Ndërmarrjet e reja të themeluara përmes Programit për Vetëpunësim në vitin 2024.

Mbështetja financiare për punësim

Grantet do të ndahen në bazë të kategorisë së të punësuarve:

• 250,000 denarë për të rinjtë deri në 29 vjeç;
• 220,000 denarë për gratë, komunitetin rom dhe përfituesit e ndihmës minimale;
• 160,000 denarë për të punësuarit mbi 29 vjeç që nuk i përkasin kategorive të mësipërme.

Përfituesit e granteve duhet të nënshkruajnë kontratë pune me të punësuarit për një periudhë që varion nga 9 deri në 15 muaj, duke garantuar kështu një stabilitet të caktuar në tregun e punës.

VLEN: Premtime të mbajtura, punë konkrete

Nga VLEN theksojnë se kjo masë është dëshmi e qartë se ndryshimi nuk është vetëm fjalë, por veprim konkret në dobi të qytetarëve dhe ekonomisë kombëtare.

“VLEN, punë konkrete për qytetarët” – përfundon deklarata zyrtare. Flaka Media