Walker rrëfen javët e para te Milani: Zgjodha numrin 32 prej Beckham, i kërkova leje për ta veshur

Gjatë intervistës së tij për GQ, mbrojtësi i ri i Milanit, Kyle Walker, foli edhe për zgjedhjen e numrit të fanellës, numrin 32: Për Milanin: “Jam pritur jashtëzakonisht mirë në çdo aspekt, mendoj se Milani po ecën në drejtimin e duhur.

Pastaj është atmosfera e ‘San Siros’, vërtet fantastike. E ndjeva veçanërisht në derbi, fatkeqësisht Interi barazoi në minutat e fundit, por për mua ishte shumë emocionuese të luaja menjëherë një ndeshje kaq të rëndësishme”.

Për zgjedhjen e tij: “Për mua, Milani është një sfidë e re. Kisha nevojë për një shkëndijë, për të rindezur dashurinë që kam për futbollin. Kujdes, nuk po them që e kisha humbur dashurinë për lojën. Por, brenda meje ndjeja nevojën për të ndërtuar një jetë të re, për të pasur sfida të reja, kundërshtarë të rinj përballë.

Pastaj është bukur ta vësh veten në provë në një kontekst krejtësisht ndryshe. Në Itali, siç është e drejtë, futbolli jetohet ndryshe nga Anglia, Spanja, Franca apo Gjermania. Këtu ka një vëmendje të madhe ndaj mbrojtësve dhe fazës mbrojtëse; tifozët vlerësojnë futbollistët kreativë, por edhe ata që arrijnë të ndalojnë kundërshtarët.

Një fitore e thjeshtë 1-0 mund të jetë e mjaftueshme, pasi për ta është bazë e mirë për të ndërtuar më tej. Dhe në fund të fundit, ata kanë të drejtë, sepse tri pikët janë gjëja më e rëndësishme për një lojtar dhe një skuadër”.

Për Milanon: “Sigurisht që jam këtu për të luajtur futboll, por e di që Milano ofron edhe shumë gjëra të tjera. Së shpejti do të jetë java e modës dhe për mua do të ishte një përvojë fantastike të shihja nga afër atë që ndodh në qytet”.

Për numrin 32: “Beckham më dërgoi një mesazh kur mbërrita te Milani, dhe unë iu përgjigja duke e pyetur nëse do ta kishte problem që të merrja numrin e fanellës (32), që ai kishte veshur këtu. David më tha: Sigurisht, për mua është një nder, merre dhe veshe me krenari. Për mua ishte diçka e rëndësishme, po flasim për një njeri që e ka ndryshuar futbollin, duke e bërë atë që është sot”.

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.