LSDM kërkon përgjegjësi politike në MPB: “Ministri duhet të japë llogari”

Rasti i lejeve të falsifikuara të vozitjes për kamionë dhe autobusë ka nxitur reagimin e LSDM-së, e cila kërkon hetim të plotë dhe përgjegjësi institucionale e politike.

LSDM ka reaguar pas zbulimit të rastit në kuadër të Ministrisë së Punëve të Brendshme, ku dyshohet se janë lëshuar leje të falsifikuara për drejtimin e automjeteve të rënda dhe autobusëve.

Nga partia opozitare kërkohet që Prokuroria Publike të zhvillojë një hetim të pavarur dhe të plotë, ndërsa institucionet kompetente të ndërmarrin masa për identifikimin dhe verifikimin e të gjitha lejeve të dyshuara.

Por për LSDM-në, çështja nuk duhet të përfundojë vetëm me përgjegjësi penale.

Partia kërkon edhe përgjegjësi politike dhe objektive për mënyrën se si ka funksionuar sistemi brenda MPB-së, duke ngritur pyetjen se si ka qenë e mundur që dokumente të tilla të falsifikuara të kalojnë nëpër procedurat institucionale.

Në këtë drejtim, LSDM vlerëson se ministri i Punëve të Brendshme duhet të japë llogari për funksionimin dhe kontrollin e sistemit nën përgjegjësinë e tij.

Rasti merr peshë të veçantë për shkak se bëhet fjalë për leje për drejtimin e kamionëve dhe autobusëve, pra automjete që transportojnë mallra dhe një numër të madh udhëtarësh.

Tani mbetet që hetimi të tregojë nëse bëhet fjalë për raste individuale apo për një mekanizëm më të gjerë të keqpërdorimit brenda MPB-së.

Nga një dokument i falsifikuar te një pyetje shumë më e madhe: kush e kontrollon sistemin që duhet të garantojë sigurinë në rrugë?