VMRO-DPMNE akuzon Zaevin dhe Filipçen për transaksione prej 1.6 miliardë eurosh përmes Eurostandard Bankës

VMRO-DPMNE ka reaguar ndaj akuzave të LSDM-së, duke rikthyer në vëmendje transaksionet financiare përmes Eurostandard Bankës gjatë periudhës së qeverisjes së Zoran Zaevit dhe Venko Filipçes. Nga partia në pushtet pretendojnë se përmes kësaj banke janë transferuar dhe “pastruar” para me origjinë nga Venezuela, ndërsa shuma e përgjithshme e transaksioneve të planifikuara arrinte në 1.6 miliardë euro.

“Vetëm gjatë periudhës së qeverisjes së LSDM-së, Zoran Zaevit dhe Venko Filipçes, përmes Eurostandard Bankës në Maqedoni janë ‘pastruar’ para të ardhura nga Venezuela. Sipas informacioneve të publikuara, kësti i parë i këtyre transaksioneve ka qenë 110 milionë euro, ndërsa shuma e përgjithshme e mjeteve që duhej të transferoheshin përmes Eurostandard Bankës arrinte në 1.6 miliardë euro”, thuhet në reagimin e VMRO-DPMNE-së.

Nga partia shtojnë se në këtë skemë përmendet edhe një kompani maqedonase, e cila kishte blerë pleh artificial në vlerë të konsiderueshme nga një kompani në Bjellorusi. Sipas VMRO-DPMNE-së, paratë më pas ishin transferuar në një llogari në Serbi, ku ishin ngrirë me kërkesë të prokurorisë.

Në reagim përmenden edhe lidhjet e pretenduara të oligarkëve nga këto vende me qeverinë e atëhershme të LSDM-së. VMRO-DPMNE pretendon se persona të tillë kishin përfituar pasaporta, tenderë dhe madje edhe plane të detajuara urbanistike në Maqedoninë e Veriut.

Partia në pushtet ngre gjithashtu pikëpyetje për kreditë e dhëna nga Eurostandard Banka për kompani që, sipas saj, kishin lidhje me familjen Zaev dhe partnerët e tyre afaristë.

Në këtë kontekst përmenden kompanitë “Sara Inzhenering”, e lidhur nga VMRO-DPMNE me Vice Zaevin, “Global Media Group” dhe “Triterol”, të cilat, sipas reagimit, kishin marrë kredi në vlerë prej miliona eurosh, por më pas nuk i kishin kthyer ato.

“Këta shembuj mjaftojnë për të treguar se burimi i kriminalitetit, korrupsionit dhe arrogancës në Maqedoni janë LSDM-ja, Venko Filipçe dhe Zoran Zaev”, thuhet në reagim.

Nga VMRO-DPMNE theksojnë se Maqedonia e Veriut nuk duhet të jetë shtet ku pushteti politik shërben për mbrojtjen e interesave të dyshimta afariste, duke paralajmëruar se përgjegjësit, sipas tyre, një ditë do të japin llogari.

Pretendimet e paraqitura në reagimin e VMRO-DPMNE-së janë akuza politike të kësaj partie dhe nuk përbëjnë, në vetvete, konstatime të vërtetuara gjyqësore. Gazeta Flaka

• 
• 
• 
• 
• 
• 
• 

32

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

24

Jo, nuk mendoj.

7

Nuk ka arsye për të protestuar.

1