Tregojnë vetë: korrupsioni masiv, me sa duket, nuk paska qenë as te BDI-ja dhe as te VLEN-i, por te VMRO-DPMNE-ja dhe LSDM-ja!

LSDM kërkon hetim për Mickoskin dhe guvernatorin Sllaveski lidhur me hyrjen e Alta Bankës në vend. VMRO-DPMNE kundërpërgjigjet duke rikthyer në vëmendje transaksionet prej 1.6 miliardë eurosh përmes Eurostandard Bankës gjatë qeverisjes së Zaevit dhe Filipçes.

Rasti i Alta Bankës ka hapur një front të ri përplasjesh politike në Maqedoninë e Veriut, ku LSDM-ja dhe VMRO-DPMNE-ja po shkëmbejnë akuza të rënda për korrupsion, transaksione financiare dhe lidhje të dyshimta mes politikës dhe biznesit.

LSDM-ja i ka kërkuar prokurorit publik, Savëski, të nisë hetim gjithëpërfshirës për hyrjen e Alta Bankës në tregun maqedonas, duke përfshirë origjinën e kapitalit, vendimet institucionale dhe personat që kanë mundësuar këtë proces.

Opozita kërkon që hetimi të përfshijë kryeministrin Hristijan Mickoski dhe guvernatorin e Bankës Popullore, Trajko Sllaveski, si dhe të sqarojë se çfarë është diskutuar dhe dakorduar me presidentin serb Aleksandar Vuçiq dhe Macurën.

“Prokurori nuk duhet të presë telefonatë. As urdhër nga foltorja e Kuvendit apo nga televizioni. Pikërisht kjo sjellje e gërryen pavarësinë e gjyqësorit dhe e rrënon plotësisht besimin e qytetarëve”, thuhet në reagimin e LSDM-së.

Partia kërkon sigurimin e menjëhershëm të llogarive, transaksioneve dhe dokumentacionit të Alta Bankës, duke insistuar që hetimet të përfundojnë para çdo transferimi të mundshëm të pronësisë. Sipas saj, një shitje e mundshme e bankës nuk duhet të shërbejë për të fshehur gjurmët apo për të shmangur përgjegjësinë.

VMRO rikthen Eurostandard Bankën dhe 1.6 miliardë eurot

Përgjigjja e VMRO-DPMNE-së nuk u përqendrua në sqarimin e drejtpërdrejtë të akuzave për Alta Bankën, por në rikthimin e një çështjeje tjetër financiare, që lidhet me periudhën e qeverisjes së LSDM-së.

Partia në pushtet pretendon se përmes Eurostandard Bankës, gjatë qeverisjes së Zoran Zaevit dhe Venko Filipçes, janë transferuar dhe “pastruar” para me origjinë nga Venezuela. Sipas VMRO-DPMNE-së, kësti i parë i transaksioneve kishte arritur në 110 milionë euro, ndërsa vlera e përgjithshme e mjeteve që planifikohej të kalonin përmes bankës arrinte në 1.6 miliardë euro.

Në reagim përmendet edhe një kompani maqedonase që kishte blerë pleh artificial nga një kompani bjelloruse, ndërsa paratë, sipas VMRO-së, ishin transferuar në një llogari në Serbi dhe më pas ishin ngrirë me kërkesë të prokurorisë.

VMRO-DPMNE ngre gjithashtu pretendime për kredi shumë milionëshe të Eurostandard Bankës ndaj kompanive që, sipas saj, kishin lidhje me familjen Zaev dhe partnerët e saj afaristë. Në këtë kontekst përmenden “Sara Inzhenering”, “Global Media Group” dhe “Triterol”.

“Këta shembuj mjaftojnë për të treguar se burimi i kriminalitetit, korrupsionit dhe arrogancës në Maqedoni janë LSDM-ja, Venko Filipçe dhe Zoran Zaev”, thuhet në reagimin e partisë në pushtet.

Korrupsioni si armë politike

Përplasja rreth Alta Bankës po shndërrohet në një betejë politike ku dy partitë më të mëdha maqedonase përpiqen t’ia atribuojnë njëra-tjetrës përgjegjësinë për aferat financiare dhe lidhjet e dyshimta me biznesin.

LSDM kërkon hetim për vendimet e pushtetit aktual, ndërsa VMRO-DPMNE kundërpërgjigjet me akuza për periudhën kur vetë ishte në opozitë. Në këtë shkëmbim akuzash, qytetarët mbeten përballë një pyetjeje thelbësore: nëse ekzistojnë dyshime për keqpërdorime financiare, pse përgjegjësia nuk përcaktohet përmes hetimeve të pavarura dhe vendimeve gjyqësore?

Partia opozitare kritikon shumicën parlamentare të udhëhequr nga VMRO-DPMNE për ndryshimet e reja në legjislacionin penal. Sipas Levicës, me propozimin e ri hiqet përgjegjësia penale për neglizhencën e personave zyrtarë dhe përgjegjës në parandalimin e financimit të terrorizmit.

Partia Levica ka reaguar ndaj ndryshimeve të reja të propozuara në Kodin Penal, duke akuzuar shumicën parlamentare të udhëhequr nga VMRO-DPMNE se po vazhdon praktikën e ndërhyrjeve të pjesshme në legjislacionin penal, në vend që të miratojë një kod tërësisht të ri.

Sipas Levicës, pas ndryshimeve të vitit 2023, të miratuara nga LSDM-ja me mbështetjen e kuorumit nga VMRO-DPMNE, dhe ndërhyrjeve të pjesshme në janar të këtij viti, pushteti po propozon sërish ndryshime përmes procedurës së shkurtuar.

Partia e konsideron veçanërisht problematike ndërhyrjen në nenin 394-v, ku, sipas saj, hiqet plotësisht dispozita ekzistuese që parashikonte dënim me burg prej një deri në dhjetë vjet për veprimet nga pakujdesia të personave zyrtarë dhe përgjegjës, të ngarkuar me parandalimin e financimit të terrorizmit.

Bëhet fjalë për funksionarë shtetërorë, persona zyrtarë, drejtues dhe persona përgjegjës në banka e institucione të tjera financiare, si dhe persona që kanë autorizime ligjore për të parandaluar aktivitete të tilla të paligjshme financiare.

“Deri më tani, ligji parashikonte përgjegjësi edhe kur një person i tillë, për shkak të pakujdesisë, shkaktonte një lëshim serioz, ndonëse sipas detyrës së tij ishte i obliguar dhe kishte mundësi ta parandalonte atë”, thekson Levica.

Partia kërkon që propozuesit të sqarojnë arsyet e fshirjes së kësaj dispozite, personat që mund të preken nga ndryshimi dhe ndikimin e mundshëm në procedurat tashmë të nisura.

Kritika edhe për raportin me Bashkimin Evropian

Levica kritikon gjithashtu vonesat e vazhdueshme në miratimin e Kodit të ri Penal, duke kujtuar premtimet e pushtetit se dokumenti do të përfundonte brenda afateve të ndryshme, të cilat vazhdimisht janë shtyrë.

Sipas partisë, në vend të një reforme gjithëpërfshirëse, Kuvendi po miraton ndërhyrje të pjesshme, të cilat mund të krijojnë paqartësi juridike dhe hapësirë për zbatim selektiv të ligjit.

Në reagim përmendet edhe raporti i Komisionit Evropian i nëntorit 2026, për të cilin Levica thotë se konstaton mungesë progresi në luftën kundër korrupsionit, pasoja të pazgjidhura nga ndryshimet e vitit 2023 dhe pasiguri juridike si rezultat i ndërhyrjeve të mëvonshme.

Partia thekson se lëndët për korrupsion të nivelit të lartë vazhdojnë të zvarriten dhe të parashkruhen, ndërsa rekomandimi për miratimin e një Kodi të ri Penal mbetet i parealizuar.

Në fund, Levica kërkon ndërprerjen e praktikës së ndryshimeve të pjesshme në legjislacionin penal dhe shpjegim publik për çdo dispozitë që hiqet, së bashku me vlerësimin e ndikimit të saj në procedurat ekzistuese.

“Drejtësia nuk mund të funksionojë sipas sistemit ‘arnim sot, kërkim arsyetimi nesër’, ndërsa përgjegjësia politike për kaosin të mos ekzistojë”, thuhet në reagimin e partisë Levica.

Në fund, as akuzat e LSDM-së për Alta Bankën dhe as pretendimet e VMRO-DPMNE-së për Eurostandard Bankën nuk mund të trajtohen si fakte të vërtetuara pa prova dhe konstatime institucionale.

Një gjë, megjithatë, bëhet gjithnjë e më e qartë: kur partitë që kanë qeverisur dhe qeverisin vendin akuzojnë njëra-tjetrën për afera miliardëshe, besimi i qytetarëve te politika dhe institucionet vazhdon të vihet në pikëpyetje. Gazeta Flaka

• 
• 
• 
• 
• 
• 
• 

32

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

24

Jo, nuk mendoj.

7

Nuk ka arsye për të protestuar.

1