Varhej: Komisioni i ardhshëm Evropian do të jetë komision i Zgjerimit

Komisioni i ardhshëm Evropian do të jetë komision i Zgjerimit, tha Oliver Varhej para liderëve të vendeve të Ballkanit Perëndimor. Sipas tij, ndjesia e urgjencës për këtë çështje tashmë është rritur dhe Komisioni i ardhshëm do të përfundojë zgjerimin e Unionit, duke përfshirë edhe vendet e rajonit, deri në fund të mandatit të tij. Duke folur për Planin e Rritjes, që peshon gjashtë miliardë euro, Varhej thekson se tashmë ka optimizëm që Ballkani të jetë gati për anëtarësim deri në vitin 2027.

“Nuk do të ketë justifikime, do të përdor terminologjinë ballkanike sepse edhe unë vij nga këtu, nuk ka justifikime që Ballkani Perëndimor të mos jetë gati deri në vitin 2027 për anëtarësim në Bashkimin Evropian”, deklaroi Oliver Varhej – Komisioner Evropian për Zgjerim.

Varhej theksoi se është koha për të bërë një hap përpara dhe urdhëroi rajonin të mos humbasë mundësinë për t’u integruar në tregun e përbashkët, përmes keqkuptimeve tradicionale mes vendeve të Ballkanit Perëndimor. Në takimin në Mal të Zi mori pjesë edhe përfaqësuesi i lartë amerikan Xhejms O’Brajan, sipas të cilit kriteret politike do të bëhen më të lehta për t’u zgjidhur nëse vendet hapin tregjet e tyre ndaj njëri-tjetrit dhe lëvizja e njerëzve dhe mallrave bëhet më e shpejtë dhe më e lirë.

“SHBA-të duan ta shohin Evropën, të plotë, të lirë dhe në paqe. Është interesi ynë për shkak të ekonomisë, qytetarëve dhe sigurisë. Kur ky rajon të bëjë përparim në atë drejtim, është në interesin tonë amerikan dhe ne do të ndihmojmë në çdo mënyrë që mundemi”, u shpreh Xhejms O’Brajan- Ndihmës Sekretar i Shtetit të SHBA-së.

Në takim ishin të pranishëm kryeministri Talat Xhaferi, kryeministri i Kosovës Albin Kurti, ai i Shqipërisë Edi Rama, presidenti serb Aleksandar Vuçiq, presidentja e Bosnjë-Hercegovinës Borjana Kristo dhe kryeministri malazez Milojko Spajiq. Ata shprehën pritshmërinë e tyre për të qenë pjesë e një tregu më të madh dhe theksuan përkushtimin e tyre ndaj reformave dhe procesit të integrimit evropian. Gjashtë miliardë euro nga BE-ja për rajonin janë të kushtëzuara me zbatimin e reformave, ndërsa për Maqedoninë e Veriut janë ndarë 850 milionë euro. Kësti i parë pritet në shtator. /Alsat.mk