Dramë në Manastir: I dyshuari për dhunë ndaj partneres 21-vjeçare arratiset nga stacioni policor përmes dritares

Një rast shqetësues i dhunës në familje dhe një arratisje nga ambientet e policisë kanë tronditur Manastirin. Një burrë i raportuar për ushtrim të dhunës fizike dhe psikologjike ndaj partneres së tij 21-vjeçare ka arritur të arratiset nga një hapësirë e SPB-së në Manastir, duke dalë përmes një dritareje të hapur, pikërisht në momentin kur zyrtarët policorë po ndërmerrnin veprime për ta privuar nga liria.

Ministria e Punëve të Brendshme konfirmon se i dyshuari është në kërkim, ndërsa për rastin është njoftuar edhe Kontrolli i Brendshëm i Ministrisë, i cili duhet të shqyrtojë rrethanat e arratisjes.

Sipas denoncimit, e reja kishte qenë për një periudhë të gjatë viktimë e dhunës fizike, presionit psikologjik dhe kërcënimeve nga partneri i saj. Ndërkohë, me vendim të Qendrës për Punë Sociale, ajo është strehuar në një qendër për mbrojtjen e viktimave të dhunës.

Denoncimi: Dhuna kishte zgjatur rreth një vit e gjysmë

Sipas informacioneve të MPB-së, më 10 nëntor, në orën 23:10, 21-vjeçarja është paraqitur në SPB-Manastir dhe ka denoncuar se po atë ditë, rreth orës 17:00, ishte sulmuar fizikisht nga partneri i saj, K.U.

Në denoncim thuhet se ajo për një kohë të gjatë ishte përballur me keqtrajtim fizik dhe psikologjik, si dhe me kërcënime. Ndër pretendimet më shqetësuese është edhe ai se partneri e kishte shtrënguar në fyt me duar, duke ia vështirësuar frymëmarrjen.

Nëna e vajzës ka deklaruar se e bija për rreth një vit e gjysmë ishte ekspozuar ndaj rrahjeve dhe kërcënimeve me jetë. Ajo u ka bërë thirrje institucioneve që të reagojnë urgjentisht dhe ta lokalizojnë të dyshuarin.

Si arriti të arratisej nga policia?

Sipas versionit zyrtar të MPB-së, në kohën kur e reja po e denonconte rastin, K.U. ishte paraqitur vullnetarisht në SPB-Manastir, i shoqëruar nga njëri prej prindërve të tij.

Megjithatë, gjatë veprimeve zyrtare që policia po ndërmerrte për privimin e tij nga liria, ai ka shfrytëzuar një dritare të hapur në hapësirën për procedurën e ndarjes dhe është larguar nga objekti.

„Menjëherë janë dërguar zyrtarë policorë dhe janë ndërmarrë masa dhe aktivitete për gjetjen e tij, të cilat vazhdojnë edhe në këtë moment“, thuhet në njoftimin e MPB-së.

Rrethanat se si i dyshuari arriti të largohej nga ambientet policore janë bërë objekt i shqyrtimit nga Kontrolli i Brendshëm.

Seanca gjyqësore shtyhet për 18 nëntor

Ndërkohë, seanca gjyqësore për caktimin e masave ndaj të dyshuarit, e cila ishte paraparë të mbahej të premten pas kërkesës së Qendrës për Punë Sociale në Manastir, është shtyrë për më 18 nëntor.

Arsyeja e shtyrjes është dorëzimi jo i rregullt i ftesës dhe mungesa e të dyshuarit në seancë.

Nga Prokuroria kanë bërë të ditur se pas denoncimit të 10 nëntorit, menjëherë kishin dhënë udhëzime që personi të thirrej për intervistim.

Ndërkohë, 21-vjeçarja vazhdon të jetë e strehuar në qendrën për mbrojtjen e viktimave, ndërsa nëna e saj kërkon që institucionet të veprojnë me urgjencë për gjetjen e personit të raportuar.

Rasti ngre pikëpyetje serioze për sigurinë e viktimave të dhunës dhe procedurat e sigurisë brenda institucioneve policore, veçanërisht kur bëhet fjalë për persona ndaj të cilëve po ndërmerren veprime për privim nga liria. Flaka

• 
• 
• 
• 
• 
• 
• 

242

Alta Banka në Maqedoninë e Veriut: Kush mban përgjegjësi për lejimin dhe avancimin e aktivitetit të saj?

Duke pasur parasysh dokumentet e viteve 2023 dhe 2025 që lidhen me aksionet e Republikës së Maqedonisë së Veriut në Alta Bankën në Beograd dhe ofertën për blerjen e aksioneve të institucioneve publike, sipas jush, cila qeverisje mban përgjegjësinë politike për ardhjen dhe avancimin e Alta Bankës në tregun e Maqedonisë së Veriut?

Voto dhe shpreh qëndrimin tënd!

Qeverisja aktuale VMRO-VLEN

169

Qeverisja e kaluar LSDM-BDI

53

Nuk kam informacion të mjaftueshëm për të gjykuar

20