Samiti ekonomik “Maqedonia 2025”, inovacionet digjitale, në fokus

Për të dytën ditë në Shkup mbahet Samiti ekonomik “Maqedonia 2025”. Fokusi i mbledhjes së këtij viti është lidershipi strategjik në një epokë ndryshimi dhe inovacioni të shpejtë, transformimi digjital dhe bashkëpunimi më i madh rajonal për të krijuar ekonomi të begata.

Gjithashtu u diskutua edhe për fuqinë dhe potencialet e inteligjencës artificiale dhe përdorimin e inovacioneve digjitale të shëndetit për të përmirësuar shërbimet mjekësore në Evropën Juglindore.

Sipas drejtoreshës së Samitit, qëllimi kryesor i tij është lidhja dhe ndarja e diturive dhe përvojave mes profesionistëve nga vendet dhe rajonet e ndryshme në funksion të rritjes, si dhe mundësi për rrjetëzimin dhe realizimin e partneriteteve të reja dhe bashkëpunimit me investitorë potencialë.

“U takuam me partnerë, të cilët besojnë në këtë iniciativë, ata të cilët besojnë se digjitalizimi i kompanive, vërtetë mund të sjellë ndryshime. Gjithashtu edhe ata të cilët konsiderojnë se duhet të bashkohemi, t’i bashkojmë forcat, duhet të krijojmë një ekosistem, i cili nuk ekziston për momentin dhe së bashku të mundohemi të ndihmojmë transformimin digjital.”, – deklaroi drejtoresha ekzekutive e “Maqedonia 2025”, Nikica Mojsovska Bllazhevski.

Samiti, jo vetëm se është një platformë rajonale për shkëmbimin e përvojave, forcimin e bashkëpunimit, por sjell edhe benefitet e tij, ku përmes digjitalizimit kontribuohet në punë më kualitative dhe më efikase, si dhe uljen e korrupsionit.

“Digjitalizimi kontribuon jo vetëm në efikasitetin, por gjithashtu siç thamë i ul mundësitë për korrupsion. Kontribuon edhe në kualitetin e punës. Mendoj së këtu kemi partneritet që po zhvillohet shkëlqyeshëm. E kemi sektorin privat, Samiti qëndron pas kësaj iniciative, kështu që me të vërtetë kemi mundësinë që t’i inkurajojmë kompanitë për inovacione, me çka Zvicra është me të vërtetë krenare që ka mundësinë e përkrahjes së digjitalizimit.”, – theksoi ambasadorja e Zvicrës në RMV, Veronika Hulman.

Demokracia, liria e fjalës në epokën e digjitalizimit po ashtu ishin temë e Samitit “Maqedonia 2025”, si dhe shumë tema tjera të lidhura me biznes modelet dhe strategjitë për transformim të shpejtë dhe të suksesshëm. (TVM2)