Problemi në Qendrën Klinike zgjidhet me 200 mijë euro! Ministri Demiri duart “e lidhura” për shkak se s’mund të hapë tender

Sallat e operacioneve kirurgjike në spitalin shtetëror kanë mbi 10 ditë që po punojnë vetëm për raste urgjente, si pasojë e problemit të stacionit të shtypjes së komprimuar. Ministri i Shëndetësisë, Ilir Demiri në intervistë për TV21 thotë se ky sistem është vjetruar dhe duhet në ndërrohet, por ai i ka duart e lidhura për shkak se kjo qeveri është teknike dhe nuk mund të shpallen tenderë.

 “Problemi substancial do të zgjidhet dhe shpresoj se shumë shpejtë do të hapet procedura e tenderimit edhe pse jemi në fazë të zgjedhjeve por kur punohet për jetë të njerëzve dhe për interes shtetëror, pra kjo është interes shtetëror funksionimi i sallave kirurgjikale në qendrën universitare “Nënë Tereza”, duhet të ndërrohet gjithë stacioni që krijon shtypjen e komprimuar, duhet të ndërrohet instalimi, i cili është mbi 30 vite bashkë me shtypjen e komprimuar, dhe duhet të ndërrohen të gjitha prizat ku vendosen aparatura për të marrë oksigjen ose për të marrë shtypje të komprimuar”, tha Ilir Demiri – ministër i Shëndetësisë.

Për këtë ai përmes një shkrese ka kërkuar nga Qeveria “qasje urgjente dhe të menjëhershme për ndryshimin e stacionit të kompresorit dhe instalimin e së njëjtës si të gjithë elementët shoqëruese” që kirurgjia nëpër qendrat klinike të mund të funksionojë pa pengesa.  Investimi sipas tij do të kapte vlerën prej 70 deri në 200 mijë euro.

 “Është një intervent që nëse përkthehet në lekë është nga 70 mijë deri në 200 mijë euro janë në pyetje. Në qoftë se fillojnë punimet besoj se brenda 10 ditëve kryhet si procedurë”, shtoi ministri i Shëndetësisë, Ilir Demiri.

Tani në qendrën klinike “Nënë Tereza” bëhen vetëm operacione urgjente, ndërsa pacientët e tjerë përcillen në spitalin “8 shtatori” dhe spitalin e qytetit të Shkupit “Shën Naumi i Ohrit”. Kjo e ka rënduar punën e këtyre spitaleve, të cilat trajtojnë raste që u vijnë nga i gjithë shteti.