Rritet numri i pacientëve në vend nga temperaturat e larta

Temperaturat e larta prekin të gjitha kategoritë e qytetarëve, prej te sëmurët kronikë, deri te ata që nuk kanë ndonjë sëmundje, pa kursyer edhe fëmijët. Mjekja Safjane Bellçishta thotë se në ordinancën e saj këtë javë është shtuar numri i pacientëve që ankohen për plogështi dhe lodhje, ndërsa tek pothuajse të gjithë është hasur tensioni i lartë apo i ulët.

“Këto ditë për shkak të të nxehtit të madh janë paraqit pacientë që janë anku se kanë plogështi, janë të lodhur, nuk mund dy hapa ti bëjnë, të ecin nëpër shkallë dhe kur të vijnë në ordinancën tonë, masim tensionin e gjakut, do të shohim se tensioni te ata persona që janë më të moshuar është më I ulët…Kurse te personat në moshën 40-45 vjeçare për herë të parë për shkak të të nxehtit është paraqit tensioni I lartë, shkaku mund të jetë dehidrimi, nuk konsumojnë sa duhet lëngje, prandaj edhe tensioni është i lartë, që shkakton edhe dhimbje në kraharor dhe shpinën e pacientëve”, tha Safjane Bellçishta mjeke.

Për t’iu shmangur dehidrimit, mjekja Bellçishta rekomandon konsumimin e lëngjeve, ushqimeve të lehta, mbajtjen e rrobave të lehta dhe me ngjyra të hapura dhe të mos ekspozohen në diell pa nevojë.

“Çdo orë nga një gotë vetëm të mos pihet menjëherë, por për 10 minuta të mbarohet gota prej 200-250 ml, që nëse e konsumon menjëherë mund të shkaktojë kundër efekt si vjellje apo plogështi…Për shkak të temperaturave të larta, pacientëve u rekomandojmë që të mos dalin nëse s’kanë nevojë prej orës 11 deri në 5, 6 se tani edhe dita është pak më e gjatë dhe orari është ndryshu. Kurse nëse kanë nevojë le të dalin, të vishen me rroba më të lehta dhe të kenë në kokë ndonjë kapelë me ngjyrë më të çelët ose ombrellë të çelët, sepse ngjyra e errët I pranon më tepër rrezet e diellit dhe mund t’i shkaktojë problem vetë pacientit”, tha Safjane Bellçishta mjeke.

Nga e enjtja vendi do të jetë në fazën portokalli, ndërsa mjekët rekomandojnë për kujdes të shtuar nga rreziqet e shkaktuara nga temperaturat e larta.