Misajllovski: Nuk ka rrezik për destabilizimin e vendit

RMV-ja është vend stabil dhe deri në këto momente nuk ka rrezik nga ndonjë destabilizim të rajonit, thotë ministri i Mbrojtjes, Vllado Misajllovski, gjatë shpalosjes së të arriturave të kësaj ministrie gjatë 100 ditëve të Qeverisë. Sipas tij, më e rëndësishme është që situata e sigurisë në vend të jetë stabile dhe shërbimet tona t’i kenë të gjitha informacionet e nevojshme, të cilat mund të na tregojnë se a mos vallë po përballemi me ndonjë kërcënim.

Misajllovski u pyet se a ka informacione për deklaratat e disa ekspertëve ushtarakë se është e mundur të ketë një lloj destabilizimi në rajon, jo si konflikt i drejtpërdrejtë, por ndoshta si formim i shoqatave terroriste.

“Në tërësi është duke u ndjekur çdo lëvizje, e cila mund të çojë deri te ndonjë destabilizim. Të gjitha strukturat edhe në vendet fqinje janë duke u monitoruar dhe çfarëdo lëvizje që mund të vërehet mblidhen informacionet dhe të njëjtat ndahen me vendet e NATO-s. Nuk ka rrezik për momentin, por me ato struktura çdoherë duhet të jemi të vëmendshëm.”, – deklaroi ministri i Mbrojtjes, Vllado Misajllovski.

Misajllovski tha se situata në Lindjen e Mesme dhe në Ukrainë është shumë shqetësuese dhe do të ketë një reflektim jo vetëm këtu, por në të gjithë Evropën, andaj është e nevojshme të fillohet dialogu dhe të arrihet paqja në rrugë diplomatike.

Ai foli edhe për tre pjesëtarët e armatës tonë, të cilët kanë mbetur të ngujuar në Libanin Jugor.

“Situata është shumë shqetësuese. Unë përmes një video-linje kam biseduar me tre oficerët tanë të stafit në Libanin e Jugut. Ata ndihen mirë, por situata është shqetësuese dhe çdo ditë po tensionohet. Ndonëse ndihen të sigurt janë vazhdimisht nëpër bunkerë dhe ditët e fundit kanë rënë mbi 300 granatime që kanë dëmtuar infrastrukturën pranë qendrave komanduese ku ndodhen. Aty pranë ka edhe aksione luftarake.”, – theksoi ministri i Mbrojtjes, Vllado Misajllovski.

Ministri Misajllovski po ashtu u ndal edhe tek ndërtimi i korridorit 8 dhe 10, të cilat janë të rëndësishme dhe prioritet për vendin, por sipas tij këto projekte nuk janë të hartuara më mënyrë të duhur. (TVM2)