Katër nga pesë dëshmitarët nuk e përmendin Grubin, dëshmitarja e fundit nuk konfirmon pretendimet e Prokurorisë

Katër nga pesë dëshmitarët kryesorë në gjykimin për Lotarinë Shtetërore nuk e kanë përmendur fare emrin e Artan Grubit në dëshmitë e tyre, ndonëse Prokuroria synonte që përmes tyre të dëshmonte ndikimin e tij në punën e këtij institucioni.

Edhe dëshmitarja e sotme, Nadije Hoxha, nuk i mbështeti pretendimet e Prokurorisë për lidhjet mes Artan Grubit dhe ish-drejtorit të Lotarisë Shtetërore, Perparim Bajrami. Pas përgjigjeve të saj, prokurorët kërkuan që ajo të shpallej dëshmitare kundërshtuese, me qëllim që ta merrnin në pyetje përmes pyetjeve të kryqëzuara.

Hoxha, e cila prej dhjetë vitesh punon në Lotarinë Shtetërore, në sektorin e transportit, dëshmoi se nuk kishte pasur asnjë marrëdhënie mes Artan Grubit dhe Perparim Bajramit në kuadër të punës së këtij institucioni.

E pyetur nëse Bajrami e kushtëzonte marrëdhënien me Grubin duke iu referuar “shefit”, ajo u përgjigj negativisht.

Pas këtyre përgjigjeve, Prokuroria kërkoi të drejtën për ta marrë atë në pyetje si dëshmitare kundërshtuese. Edhe gjatë pyetjeve shtesë, Hoxha nuk i ndryshoi deklaratat e saj.

Sipas të dhënave nga gjykimi, nga pesë dëshmitarët kryesorë, përmes të cilëve Prokuroria synonte të dëshmonte ndikimin e Grubit, katër nuk e kanë përmendur fare emrin e tij.

I vetmi që e ka përmendur është Andrej Krstevski. Ai ka deklaruar se Artan Grubi dhe Perparim Bajrami kishin afërsi partiake dhe se i kishte parë së bashku në veprimtari partiake. Megjithatë, ai nuk ka paraqitur ndonjë dëshmi konkrete për bashkëpunim apo ndikim të Grubit në punën e Lotarisë Shtetërore.

“Nëse Perparim Bajrami ka marrë udhëzime nga Artan Grubi për punën e Lotarisë Shtetërore, nuk e di. Di vetëm se Perparimi e kushtëzonte atë me ‘shefin’”, ka deklaruar Krstevski.

Në periudhën për të cilën bëhet fjalë, Grubi ishte funksionar i lartë i BDI-së, shef i kabinetit të kryetarit të partisë, Ali Ahmeti, dhe zëvendëskryeministër në Qeveri.

Dëshmitë e deritanishme janë pjesë e rëndësishme e vlerësimit të pretendimeve të Prokurorisë për ndikimin e Grubit në Lotarinë Shtetërore. Megjithatë, ato nuk përbëjnë përfundim për përgjegjësinë e tij penale. Për këtë do të vendosë gjykata, duke vlerësuar të gjitha dëshmitë dhe provat e paraqitura gjatë procesit. Gazeta Flaka

70

“A po realizohet programi zgjedhor në Komunën e Tetovës?”

Po realizohet

21

Nuk po realizohet

42

Nuk e di

7