Gjykatësi kushtetues Osman Kadriu kundërshton vendimin e Gjykatës Kushtetuese për shfuqizimin e balancuesit

Gjykatësi kushtetues Osman Kadriu kundërshton vendimin e Gjykatës Kushtetuese për shfuqizimin e balancuesit. Sipas tij, vendimi është pastër antikushtetues, pasi që përfaqësimi i drejtë dhe adekuat është kategori kushtetuese dhe nuk mund të shfuqizohet.

Sipas tij, nuk mbajnë arsyetimet e kryetarit të Gjykatës Kushtetuese se me balancuesin janë shkelur të drejtat dhe liritë e qytetarëve sa i përket deklarimit dhe është bërë diskriminim në bazë të barazisë pasi që në një konkurs nuk kanë qenë të barabartë të gjitha bashkësitë të konkurrojnë.

Kadriu shpreh dyshim se ka pasur presion politik që Gjykata Kushtetuese ta shfuqizojë balancuesin, apo instrumentin i cili garanton përfaqësimin e drejtë të përkatësive etnike në administratën publike.

Pas vendimit të sotëm, gjykatësi Kushtetues Kadriu, shpjegon procedurat juridike se si mund të zgjidhet çështja e përfaqësimit. Ai thotë se ligji i ri i paralajmëruar për përfaqësim të drejtë duhet patjetër të parashikojë përfshirjen e përkatësive etnike pasi që s’mund ta shmangë kategorinë kushtetuese.

Zgjidhja e përhershme, sipas Kadriut duhet të rregullohet me ndryshimet kushtetuese, gjegjësisht vendimet në Gjykatën Kushtetuese të kalohen me badenter që të mos mund të mbivotohen shqiptarët. /Alsat.mk