Kuvendi, dritë të gjelbër Ligjit për Arsimin e Mesëm

Në Kuvend vazhdon procedura për miratimin e Ligjit për Arsimin e Mesëm. Pas seancës plenare debati zhvendoset në Komisionin amë. Propozim-ligji, që mes tjerash parashikon që gjatë shënimit të patronatit, fillimit dhe përfundimit të vitit shkollor në shkollat e mesme të intonohet himni i shtetit, sipas vendimit të themeluesit shkaktoi debat të ashpër mes shumicës dhe opozitës. Ministrja e Arsimit, Vesna Janevska tha se është e palogjikshme që shtetasve të Ballkanit intonimi i himnit mos t’ju pengoj në shtetet e huaja ku punojnë si Zvicër, Gjermani, Francë ose SHBA ndërkohë që ju pengon në Maqedoni.

“Pyes vallë ato etnitete të ndryshme nga Ballkani që jetojnë në Zvicër kanë diçka kundër intonimit të himnit të Zvicrës kur atje janë prezent ose kanë diçka kundër himnit të SHBA-së kur atje jetojnë dhe prej atje marrin pagë. Vetëm në Maqedoni himni bëhet problem. Himni nuk mund t’i prish marrëdhëniet ndëretnike, himni na bashkon, i përmirëson marrëdhëniet ndëretnike sepse ndërton përkatësinë ndaj shtetit tonë të vetëm dhe të përbashkët”, tha Vesna Janevska, ministre e Arsimi.

Ilire Dauti nga Fronti Evropian tha se himni nuk përmban elemente shqiptare dhe si i tillë nuk duhet të jetë i detyrueshëm.

“Ai buxhet i cili njëjtë mbushet nga të gjithë dhe të gjithë kontribuojmë në mënyrë të barabartë në mbushjen e tij duhet të reflektoj pastaj barazi në shpërndarjen e atyre mjeteve që ata fëmijë që ju thoni se duhet ta intonojnë himnin ta ndjejnë se janë të barabartë, kanë marr hisen e vet që ju takon ashtu siç kanë participuar prindërit e tyre në tatimet dhe kontributet që i kanë dhënë për atë buxhet”, tha Ilire Dauti, Fronti Evropian.

Deputeti, Adnan Azizi tha se VLEN ka vërejtjet e veta rreth këtij propozimi për të cilin edhe do të parashtroj amendamente.

“Gjithsesi që ne kemi vërejtjet tona dhe propozimet tona dhe si të tillë ne do të kemi propozim amendamentet tona në leximin e dytë ku ne do të qëndrojmë mbrapa atyre propozimeve deri në fund. Ajo që dua të theksoj dhe t’i garantoj gjithë shqiptarët se ne jemi këtu për ti përfaqësuar shqiptarët për ti mbrojt denjësisht të drejtat e shqiptarëve dhe për dallim nga ju që sot flitni si skenderbega dhe kur ishit në pozitë ishit tenderbega”, u shpreh Adnan Azizi, VLEN.

Debat të ngjashëm pati edhe në leximin e parë në komisionin juridiko-ligjvënës.