“Bashkëpunimi në mes RMV-së dhe Bullgarisë tani është më i rëndësishëm se kurrë”

Ambasadori i BE-së në RMV, Mihalis Rokas, beson se bashkëpunimi mes Maqedonisë së Veriut dhe Bullgarisë është më i rëndësishëm tani se kurrë.

Ai sot mori pjesë në konferencën e mbajtur në qendrën për shtyp të Agjencisë Telegrafike Bullgare (BTA) në Shkup, ku u diskutua për projektin BTA, me titull “Evropa në Ballkan: Së bashku përmes njohurive”, mbështetur nga Komisioni Evropian.

Rokas theksoi se pikërisht kjo ngjarje dëshmon përkushtimin e të dy vendeve për forcimin e lidhjeve dypalëshe dhe nxitjen e zhvillimit rajonal, rritjes ekonomike dhe shkëmbimit kulturor.

Ky bashkëpunim, tha ai, është një demonstrim i partneritetit të qëndrueshëm që ekziston midis dy kombeve dhe vizionit të tyre të përbashkët për një të ardhme të qëndrueshme, të begatë dhe evropiane.

Rokas vuri në dukje se procesi i integrimit nuk ka të bëjë vetëm me anëtarësimin në Bashkimin Evropian, por ka të bëjë me sigurimin e stabilitetit, paqes dhe prosperitetit të përbashkët për të gjithë.

“Bashkimi Evropian ka zhvilluar një kornizë për bashkëpunim dypalësh me pesë fqinjët e Maqedonisë së Veriut – Shqipërinë, Kosovën, Greqinë, Bullgarinë dhe Serbinë. Këto partneritete bazohen në respektin reciprok, qëllimet e përbashkëta dhe një përkushtim për të gjetur gjuhën e përbashkët në adresimin e sfidave. Ka rrënjë të thella në bashkëpunimin mes Bullgarisë dhe Maqedonisë së Veriut. Filloi edhe para institucionalizimit të tij zyrtar, me ndihmën e programeve ndërkufitare të financuara nga Bashkimi Evropian. Vitet e fundit ka pasur disa projekte që kanë dhënë rezultate të rëndësishme”.

“Deri më sot janë miratuar gjithsej 184 projekte. Prej tyre, 178 janë përfunduar plotësisht, ndërsa gjashtë projekte janë në fazën e zbatimit. Gjithashtu, në javët në vijim pritet të nënshkruhen marrëveshjet për subvencionimin e tetë projekteve të reja. Ne kemi arritur rezultate në sektorët e arsimit dhe kulturës, mbrojtjes së mjedisit, turizmit dhe trashëgimisë kulturore, zhvillimit ekonomik dhe mbështetjes së biznesit”, tha Rokas.