Babai i Sarës në protestin kundër dhunës ndaj grave: Asnjë prind të mos e përjetojë atë që na ndodhi neve
Babai i 26-vjeçares Sara Gjorgjieska, e cila më 15 nëntor u rrah brutalisht nga i dashuri i saj, Kristian Koraboski, dhe u la pa ndjenja në rrugë në Ohër, sot iu bashkua protestës kundër dhunës ndaj grave dhe femicidit, duke mbajtur fotografinë e vajzës së tij, në të cilën shihen qartë mavijosjet në fytyrë.
„Kjo është vajza ime Sara. Asnjë prind të mos e shohë fëmijën e tij në këtë gjendje dhe të mos përjetojë atë që na ndodhi neve“, tha shkurt babai i saj, Ljupço Gjorgjieski.
Me thirrjet „Ohri nuk hesht“ dhe „Asnjë më shumë“, qytetarët sot dolën në rrugë për të protestuar kundër dhunës ndaj grave dhe për të kërkuar përgjegjësi nga institucionet, si dhe mbrojtje më të madhe për viktimat.
Protesta u organizua pas rastit të rëndë të 15 nëntorit, kur Sara Gjorgjieska u rrah brutalisht nga i dashuri i saj, 31-vjeçari Kristian Koraboski, i cili më pas e hodhi nga automjeti në rrugë, duke e lënë pa ndjenja.
Koraboski ndodhet në paraburgim prej 30 ditësh dhe akuzohet për veprat penale „Lëndim trupor“, „Privim i kundërligjshëm nga liria“ dhe „Rrezikim i sigurisë“. Seanca gjyqësore pritet të fillojë më 27 nëntor në Ohër.
Gjatë protestës, qytetarët kërkuan reagim në kohë ndaj çdo denoncimi për dhunë, hetime efikase dhe veprim institucional pa ndikime politike.
„Më 15 nëntor, në qytetin tonë ndodhi një rast i tmerrshëm dhune, një rast që na tronditi të gjithëve dhe na rikujtoi se dhuna nuk ndodh diku larg nesh. Ajo ndodh këtu, mes njerëzve që i njohim. Dhuna nuk është çështje private, nuk është problem i një personi apo i një familjeje. Ky është problem i përbashkët. Heshtja e mbron dhunën. Ohri nuk hesht më, nuk duam më viktima“, deklaruan organizatorët e protestës.
Pas tubimit në shëtitoren buzë liqenit të Ohrit, qytetarët marshuan nëpër Çarshinë e qytetit dhe më pas u drejtuan edhe te ndërtesa e Gjykatës Themelore në Ohër.
Mesazhi i protestës ishte i qartë: dhuna ndaj grave nuk mund të trajtohet si çështje private dhe heshtja nuk është më një alternativë.
Flaka















