BDI: Autostrada Shkup- Bllacë u dëmtua pa bulevardin “Hasan Prishtina”. VLEN po e shkatërron lidhjen jetike që BDI e kishte siguruar
Botuar nga Flaka
Me 6 prill 2023, Qeveria e udhëhequr nga BDI ndau 8 milionë euro për ndërtimin e bulevardit “Hasan Prishtina”, rrugës së njohur edhe si Rruga e Kaçanikut, në drejtim të Kosovës, deri te qarkorja e Shkupit, ku do të lidhej me qarkoren dhe autostradën Shkup- Bllacë.
BDI kishte siguruar 2 milionë euro për ndërtimin e rrethrrotullimit te semaforët e bulevardit “Slloveneçka”, si dhe 6 milionë euro për realizimin e bulevardit “Hasan Prishtina”, mjete të cilat iu transferuan Qytetit të Shkupit.
Ky projekt nuk ishte rastësor. BDI kishte projektuar një lidhje të plotë infrastrukturore, sepse autostrada Shkup- Bllacë nuk ka asnjë kuptim të plotë pa një hyrje moderne, funksionale dhe dinjitoze në Shkup nga drejtimi i Kosovës. Sot, e vetmja hyrje në Shkup që nuk ka formën e një bulevardi është pikërisht hyrja nga Kosova.
Qyteti i Shkupit e kishte projektuar bulevardin dhe ishin zhvilluar bisedime edhe me afaristët e zonës së Vizbegut. Pra, VLEN nuk kishte nevojë të shpikte asgjë të re, por vetëm të vazhdonte dhe të realizonte projektin jetik që BDI e kishte përgatitur dhe financuar.
Por sot, në vend që këto mjete të përdoren për realizimin e këtij projekti strategjik, VLEN po i largon ato dhe po i orienton drejt një projekti tjetër në qendër të Shkupit. Kjo është dëshmi e qartë e paaftësisë për të kuptuar dhe realizuar projekte strategjike, por edhe e hipokrizisë së tyre ndaj lidhjes Shkup- Bllacë.
E njëjta paaftësi dhe hipokrizi u dëshmua edhe me autostradën Shkup- Bllacë, të cilën BDI ua la të përgatitur dhe të gatshme për realizim, ndërsa VLEN e vonoi për dy vjet e gjysmë dhe e shtrenjtuan projektin për mbi 30 milionë euro.
Nuk mund të flitet për autostradën Shkup- Bllacë, ndërkohë që largohen mjetet për rrugën që duhet ta lidhë atë drejtpërdrejt me Shkupin. Autostrada pa bulevardin “Hasan Prishtina” është një lidhje e cunguar, ndërsa vendimi për t’i larguar këto mjete dëshmon se VLEN nuk ka as vizion, as kapacitet për ta kuptuar rëndësinë strategjike të këtij projekti.
BDI e kishte projektuar dhe buxhetuar të gjithë lidhjen, nga kufiri me Kosovën deri në Shkup. VLEN, edhe projektet e gatshme që i gjen, arrin t’i vonojë, t’i shtrenjtojë dhe t’i dëmtojë.
VLEN i është përgjigjur reagimit të Bashkimit Demokratik për Integrim lidhur me projektet infrastrukturore, duke e akuzuar partinë opozitare se gjatë dy dekadave në pushtet ka bërë më shumë premtime sesa punë konkrete.
Nga VLEN-i thonë se BDI-ja vazhdon të mburret me “sigurimin” e mjeteve financiare dhe përgatitjen e projekteve, por, sipas tyre, qytetarëve u ofron të njëjtën histori që e kanë dëgjuar për 20 vjet.
“Për dy dekada, BDI-ja premtoi projekte, paralajmëroi autostrada, projektoi rrugë dhe fliste për investime. Por, në fund, qytetarëve u mbetën premtimet, ndërsa elitës partiake privilegjet”, thuhet në reagimin e VLEN-it. Koalicioni qeverisës pretendon se dallimi ndërmjet tij dhe BDI-së tashmë është i dukshëm, pasi, siç thekson, projektet që për vite ishin paraqitur në harta dhe konferenca për shtyp, sot janë shndërruar në kantiere ndërtimi.
VLEN-i përmend ndërtimin e autostradës drejt Gostivarit, avancimin e lidhjes autostradale drejt Kërçovës, nisjen e punimeve për lidhjen rrugore drejt Kosovës dhe realizimin e Korridorit 8.
“Derisa BDI-ja fotografohet, VLEN punon në terren”, deklarojnë nga koalicioni. Në reagim shtrohet pyetja se përse projektet nuk u realizuan gjatë periudhës së gjatë kur BDI-ja ishte pjesë e pushtetit, nëse mjetet financiare dhe dokumentacioni, siç pretendon kjo parti, ishin siguruar.
“Nëse gjithçka ishte siguruar, pse për 20 vjet nuk u ndërtuan këto projekte? Ku ishin ato para? Pse pjesa perëndimore e vendit mbeti për dy dekada me rrugë të ngushta, pika të rrezikshme, trase të papërfunduara dhe infrastrukturë që nuk i plotësonte nevojat e qytetarëve?”, pyesin nga VLEN-i.
Sipas tyre, gjatë kohës kur BDI-ja ishte pjesë e qeverive të ndryshme, projektet e mëdha infrastrukturore shpesh mbetën në nivelin e prezantimeve, paralajmërimeve dhe premtimeve për tenderë, ndërsa qytetarët e Tetovës, Gostivarit, Kërçovës, Strugës dhe komunave të tjera prisnin investimet e paralajmëruara.
VLEN-i pohon se aktualisht, krahas projekteve autostradale, po ndërtohen bulevarde në Tetovë, po investohet në kampusin e ri të Universitetit “Nënë Tereza” në Shkup dhe po zhvillohen projekte infrastrukturore në Strugë.
Gjithashtu, sipas koalicionit, po ndërtohen rrugë, kanalizime dhe ujësjellës në komunat ku jetojnë shqiptarët. “Ekskavatorët janë në terren, ndërsa BDI-ja është në konferenca për shtyp. Ky është dallimi”, thuhet në komunikatë.
Nga VLEN-i e akuzojnë BDI-në se po përpiqet të marrë meritat edhe për projektet që po realizohen aktualisht, duke nënvizuar se sigurimi i mjeteve dhe përgatitja e dokumentacionit nuk kanë vlerë nëse nuk pasohen nga realizimi konkret.
“Paratë në letër nuk janë autostradë. Projekti në sirtar nuk është bulevard. Premtimi në konferencë për shtyp nuk është infrastrukturë. Qytetarët nuk udhëtojnë mbi deklaratat e partive, por mbi rrugët që ndërtohen”, theksojnë nga VLEN-i.
Koalicioni qeverisës vlerëson se qytetarët tani mund të krahasojnë atë që u është premtuar gjatë viteve me projektet që, sipas tij, po realizohen sot. “BDI-ja la pas dosje dhe premtime. VLEN po lë pas rrugë, ura dhe projekte të realizuara”, përfundon reagimi. Gazeta Flaka
Botuar nga Flaka
Shkollat po mbyllen, fshatrat po zbrazen: alarmi demografik në Maqedoninë e Veriut
BALLKANI SOT
