“E Veriut”, çmimi politik për Shkupin!

“Çdo deklaratë e presidentit ka një çmim politik. Këtu e shohim se çfarë ndodhi në 24 orët e para”, thotë analisti politik Petar Arsovski, pasi në rajon pati reagime të shumta për vendimin e Siljanovskës që të mos shqiptojë “E Veriut” në betimin solemn në Parlament dhe marrjes së detyrës më të lartë në vend

Presidentja e re Gordana Siljanovska Davkova dhe VMRO-DPMNE, si parti që me siguri do të udhëheqë qeverinë e ardhshme të Maqedonisë së Veriut, besojnë se kanë të drejtë të përdorin vetëm emrin “Maqedoni” në paraqitjet publike. Marrëveshja e Prespës, me të cilën u shtua emri zyrtar i shtetit “E Veriut”, është realitet edhe për partinë edhe për presidentin dhe thonë se “nuk do t’i ikin përdorimit zyrtar”.

Këto janë qëndrimet e shefes së re të shtetit dhe partisë që e mbështeti në garën për presidente, VMRO-DPMNE, pas reagimeve nga autoritetet në Greqi, Bullgari dhe Bashkimin Evropian, me rikujtim të respektojnë marrëveshjet që Shkupi ka arritur me Athinën dhe Sofjen. Një varg reagimesh nga bashkësia ndërkombëtare mbërritën në adresën e Shkupit pasi Gordana Siljanovska Davkova nuk e përdori emrin e ri kushtetues – Republika e Maqedonisë së Veriut në betimin e bërë më 12 maj në Parlament. Mesazhi është se rruga e mëtejshme e vendit drejt anëtarësimit të plotë në BE varet nga respektimi i Marrëveshjes së Prespës me Greqinë në vitin 2018, si dhe Marrëveshja e Fqinjësisë së Mirë me Bullgarinë nga viti 2017.

SILJANOVSKA DO T’I PËRMBAHET PËRDORIMIT ZYRTAR TË EMRIT KUSHTETUES

Në paraqitjet e saj publike, presidentja e Maqedonisë ka të drejtë të përdorë emrin Maqedoni, si akt i të drejtës personale për vetëvendosje dhe vetëidentifikim, duke respektuar të drejtat dhe liritë themelore të njeriut dhe në përputhje me vlerat dhe parimet evropiane, thonë nga Kabineti i Presidentes, Gordana Siljanovska-Davkova. Nga atje thonë se presidentja Siljanovska-Davkova do t’i përmbahet përdorimit zyrtar të emrit kushtetues, dhe në përputhje me Kushtetutën, siç është përgatitur nga shërbimet e Kuvendit, betimi solemn është nënshkruar duke përdorur emrin kushtetues. Në 5 vitet e fundit, institucionet e vendit pothuajse plotësisht i kanë përmbushur obligimet e tyre nga Marrëveshja e Prespës dhe presidenti pret që të gjithë partnerët e vendit të respektojnë obligimet bilaterale dhe shumëpalëshe që i kanë marrë ndaj vendit.

VMRO-DPMNE DO TË RESPEKTOJË KUSHTETUTËN DHE LIGJET

Nga VMRO-DPMNE thonë se po i përcjellin me kujdes reagimet dhe shtojnë se anëtarësimi në NATO dhe BE është qëllimi i tyre strategjik dhe si qeveri e ardhshme do të respektojnë Kushtetutën. “Komunikimi i përgjithshëm institucional, si dhe vetë institucionet, të cilat kanë të bëjnë me zbatimin e Marrëveshjes së Prespës, janë realitet dhe ne si qeveri e ardhshme synojmë të sillemi ashtu, në përputhje me Kushtetutën dhe ligjet. Nuk do të lejojmë izolimin e qytetarëve për gabimet strategjike të qeverisë LSDM-BDI, të cilat nënshkruajnë marrëveshje katastrofike për të mbuluar krimin dhe korrupsionin. Është e drejtë themelore e njeriut që Maqedonia të përdoret në përdorim personal dhe këtë të drejtë do ta mbajmë”, thonë nga kjo parti.

Nga VMRO-DPMNE shtojnë se si qeveri e ardhshme synojnë sinqerisht të zhvillojnë marrëdhënie të ngushta dhe miqësore me të gjithë fqinjët. “Ne besojmë sinqerisht në mbështetjen e fqinjëve tanë në procesin e integrimit tonë në BE. Ne duhet të hapim një kapitull të ri në historinë tonë të zhvillimit, prosperitetit, stabilitetit, sjelljes së përgjegjshme dhe përparimit. Këtë e kemi premtuar në zgjedhje dhe do t’i përmbahemi”, siguron VMRO-DPMNE.

Nënshkrimi i Marrëveshjes së Prespës zgjidhi mosmarrëveshjen gati tre dekadash me Greqinë për emrin e shtetit, që zhbllokoi rrugën drejt anëtarësimit të plotë në BE dhe NATO. Sot Maqedonia e Veriut është anëtare e Aleancës, por është në pritje të hapjes së klasterave në negociatat me Brukselin. Që të ndodhë kjo, është e nevojshme të bëhen ndryshime kushtetuese që do të përfshijnë edhe bullgarët dhe komunitetet e tjera në Preambulën e Kushtetutës.

ÇMIM POLITIK

“Çdo deklaratë e presidentit ka një çmim politik. Këtu e shohim se çfarë ndodhi në 24 orët e para”, thotë analisti politik Petar Arsovski, pasi në rajon pati reagime të shumta për vendimin e Siljanovskës që të mos shqiptojë “E Veriut” në betimin solemn në Parlament dhe marrjes së detyrës më të lartë në vend. Në prag të inaugurimit, Athina ka njoftuar tashmë se do të monitorojë me kujdes çdo hap në vend, veçanërisht përdorimin e emrit kushtetues, i cili u kontestua nga disa prej kandidatëve gjatë fushatës zgjedhore.

Arsovski thotë se pavarësisht nëse presidentes së re i pëlqen apo jo “E Veriut”, ajo gjatë betimit duhet të respektojë Kushtetutën, e me këtë edhe emrin e ri të shtetit për të cilin janë dakorduar qeveritë e dy vendeve. “Ajo nuk është në gjendje të vendosë si në një raft në një supermarket që mua më pëlqen do ta respektoj, dhe atë që nuk më pëlqen nuk do ta respektoj. Marrëveshja e Prespës është punë e kryer dhe duhet pranuar dhe respektuar në vend, përndryshe do të paguajmë një çmim shumë të lartë. Marrëdhëniet me Greqinë do të kundërshtohen dhe armiqtë tanë do të shumohen”, potencoi Arsovski.

Arsovski thotë se në demokraci secili ka të drejtën e mendimit të vet, por nuk e kupton këtë “fintë” të Siljanovskës. “Nëse plani i presidentit të ri është ndërprerja e Marrëveshjes së Prespës – kjo do të thotë largim nga NATO, përfundim i marrëveshjes dhe kthim i emrit. Siljanovska mund të mendojë se çmimi që kemi paguar është më i lartë se përfitimet. Por këtë duhet ta thotë, duhet të mbrojë një tezë të tillë politike. Kështu ndodhemi në një situatë ku jemi ‘dyfish lakuriq’. Nuk e kemi kthyer emrin dhe as do të shohim përfitimet e Marrëveshjes së Prespës. Dhe efektet negative do t’i ndjejmë akoma”, thotë analisti politik, Petar Arsovski. (koha.mk)