Hetime të reja për vdekjen e pacientit në spitalin psikiatrik, policia mbledh dokumentacion
Vdekja e Kristijan Josip Perishit, i cili ndërroi jetë para një muaji në Spitalin Psikiatrik „Shën Ivan“ në lagjen Jankomir të Zagrebit, po merr një drejtim të ri hetimor.
Policia kriminalistike kroate po mbledh dokumentacion dhe korrespondencë nga persona që kanë pasur njohuri për rrethanat e vdekjes së pacientit, me qëllim që të përcaktojë se kush ishte në dijeni të ngjarjeve në spital dhe si u janë përcjellë informacionet institucioneve kompetente.
Sipas informacioneve të publikuara nga gazeta kroate „Jutarnji list“, gjatë ditëve të fundit policia ka mbledhur dokumente nga persona që, në çfarëdo cilësie, kanë qenë të informuar ose të përfshirë në procedurat pas vdekjes së pacientit.
Vëmendje e veçantë po i kushtohet komunikimit ndërmjet spitalit, institucioneve të tjera përkatëse dhe Ministrisë së Shëndetësisë.
Hetuesit po përpiqen të përcaktojnë me saktësi se kush ka qenë në dijeni të zhvillimeve në spital dhe në çfarë mënyre informacionet për vdekjen e pacientit u janë komunikuar organeve kompetente.
Hetimi përqendrohet edhe te përgjegjësia e mundshme e drejtuesve të spitalit, si dhe te dyshimet për keqpërdorim të pozitës dhe autorizimit zyrtar.
Sipas „Jutarnji list“, disa persona që kanë pasur njohuri për rrethanat e rastit tani druajnë se hetimi mund të përfshijë edhe veprimet e tyre. Megjithatë, deri më tani nuk ka konfirmim zyrtar se procedura do të zgjerohet me persona të tjerë të dyshuar.
Rasti i vdekjes së pacientit të ri ka shkaktuar vëmendje të madhe në opinionin kroat. Procedura po zhvillohet nën dyshimin për vrasje, ndërsa si të dyshuar janë përmendur katër punonjës shëndetësorë.
Mbledhja e re e dokumentacionit dhe korrespondencës mund t’u ndihmojë hetuesve jo vetëm në zbardhjen e rrethanave të vdekjes, por edhe në përcaktimin e mënyrës se si kanë vepruar punonjësit e spitalit dhe institucionet përgjegjëse pas ngjarjes.
Deri tani, policia dhe prokuroria kroate nuk kanë publikuar detaje zyrtare për hapat e rinj hetimorë.
Flaka















