Ligji për përfaqësim të drejtë ndez përplasje akademike: Maksuti e quan pa mekanizma, Shasivari e mbron

Ligji i Qeverisë për Përfaqësim të Drejtë dhe Adekuat, përveç debatit politik, ka hapur edhe një përplasje të thellë në radhët e botës akademike. Në emisionin “Debat në Shenja”, profesorët Mersim Maksuti dhe Jeton Shasivari shprehën qëndrime diametralisht të kundërta për natyrën dhe efektin e ligjit të propozuar.

Prof. Maksuti e kritikoi ashpër konceptin e trupit koordinues të paraparë në ligj, duke theksuar se ai nuk ka fuqi reale zbatuese dhe ndëshkuese, gjë që sipas tij e bën ligjin joefektiv në praktikë.

Sipas Maksutit, struktura e parashikuar ka vetëm rol monitorues dhe raportues, pa mekanizma detyrues ndaj institucioneve që nuk e respektojnë përfaqësimin adekuat. Ai shtoi se pikërisht kjo mungesë e instrumenteve shtrënguese ka qenë një nga arsyet e largimit të tij nga grupi koordinues.

Në anën tjetër, prof. Shasivari mbrojti qasjen e propozuar, duke theksuar se jo çdo ligj funksionon mbi bazën e gjobave apo sanksioneve direkte, dhe se efektiviteti institucional nuk varet domosdoshmërisht nga ndëshkimi.

Ai theksoi gjithashtu se nevoja për një ligj të ri nuk lidhet vetëm me vendimin e Gjykatës Kushtetuese për shfuqizimin e “Balancuesit”, por edhe me rekomandimet dhe kritikat e vazhdueshme të Komisionit Evropian.

Ndërkohë, në debat është përfshirë edhe aspekti politik, pasi përveç propozimit të Qeverisë që ndodhet në procedurë parlamentare, deputeti Ziadin Sela ka dorëzuar gjithashtu një propozim-ligj të veçantë për përfaqësim të drejtë dhe adekuat, të cilin opozita e konsideron më të plotë se zgjidhja qeveritare.

Debati pritet të vazhdojë në Kuvend, mes versioneve të ndryshme të ligjit dhe interpretimit të efektivitetit të tij institucional. Gazeta Flaka