Maturantët e mjekësisë në alarm: “Na kanë bërë padrejtësi”, ndërsa MASH thotë se gjithçka është gati për vitin e ri

Një maturant i shkollës së mesme të mjekësisë ka reaguar ashpër pas njoftimit se nuk mund të vazhdojë studimet në një fakultet jashtë drejtimit të mjekësisë, duke pretenduar se kufizimi u është komunikuar vetëm pasi kanë përfunduar aplikimet.

Në një denoncim të dërguar në redaksinë e “Pa Censurë”, maturanti thotë se ai dhe nxënës të tjerë kanë përfunduar maturën profesionale, kanë aplikuar në fakultetet që kanë zgjedhur dhe kanë paguar nga 800 denarë për çdo aplikim.

Sipas tij, problemi është shfaqur vetëm në fund të procesit, kur aplikuesit kanë pritur rezultatet.

“Çka na kanë bo neve është padrejtësi e madhe. Kemi kry shkollën e mesme të mjekësisë, e kemi kalu maturën profesionale, kemi apliku në fakultete edhe kemi pagu nga 800 denarë për çdo aplikim.”

Ai pretendon se vetëm një ditë para publikimit të rezultateve, fakultetet i kanë njoftuar se aplikimet duhet të tërhiqen, duke u thirrur në një rregullore dhe në një urdhër që, sipas tyre, vinte nga ministrja e Arsimit.

“Na kanë dal me rregullore që nuk na lejohet me vazhdu fakultet jashtë drejtimit të mjekësisë. Thojne kena urdhër prej ministreshes, nuk mund të ju pranojmë.”

Maturanti ngre pyetjen pse kjo nuk u është komunikuar më herët, para se të jepnin maturën profesionale dhe para se të aplikonin në fakultete.

“I pyesin pse nuk keni tregu para se me e bo maturen, para se me apliku? Po kur aplikum edhe na morët paret, edhe na hupët afatin e parë, thojnë hajde merrni dokumentat. As paret nuk mund t’ua kthejmë.”

Sipas tij, fakultetet i kanë kontaktuar aplikuesit për t’u kërkuar tërheqjen e dokumenteve, ndërsa afati i parë i regjistrimit tashmë ka kaluar.

“Fakultetet na kanë kontaktu me i tërheq aplikimet. Na e kanë hup afatin e parë, paret që i kemi pagu nuk na i kthejnë, e krejt kjo pa na tregu me kohë”, shprehet maturanti.

Ai e konsideron situatën si një padrejtësi ndaj nxënësve, pasi vendimi, sipas tij, është komunikuar pasi ata kishin kryer të gjitha procedurat dhe kishin shpenzuar para për aplikimet.

“Nëse ka pas rregullore të tillë, është dashtë me na tregu para se me apliku, jo tash në fund kur i kemi kry krejt procedurat. Na kanë humb afatin, na kanë humb paret edhe na kanë lanë pa mundësi me vazhdu shkollimin që kemi zgjedh vetë.”

Rasti tashmë ngre disa pikëpyetje: Kur ka hyrë në fuqi rregullorja? A kanë qenë maturantët të informuar para aplikimit? Kush mban përgjegjësi për tarifat e paguara dhe afatin e humbur?

Përgjigjet e Ministrisë së Arsimit dhe Shkencës do të jenë vendimtare për të sqaruar nëse bëhet fjalë për zbatim të një rregulli ekzistues apo për një ndryshim që maturantëve u është komunikuar me vonesë.

Ndërkohë, për këta maturantë koha nuk është thjesht procedurë administrative – është një vit studimi dhe një mundësi për të ardhmen.