Mucunski paralajmëron edhe 7 vakanca të reja diplomatike

Maqedonia e Veriut aktualisht ka 11 ambasada dhe përfaqësi diplomatike pa ambasadorë, ndërsa në gjashtë muajt e ardhshëm pritet t’u përfundojë mandati edhe gjashtë apo shtatë ambasadorëve të tjerë.

Ministri i Jashtëm, Timço Mucunski, tha se në vendet ku mungojnë ambasadorët janë emëruar ushtrues detyre, të cilët, sipas tij, po i kryejnë përgjegjësitë pa lejuar që mungesa e ambasadorit të ndikojë në funksionimin e misioneve diplomatike.

Një nga emërimet e reja tashmë është bërë i ditur. Krum Efremov pritet të jetë ambasadori i Maqedonisë së Veriut në Bullgari, pasi më herët ka shërbyer si ambasador në Ukrainë.

“Do të jetë Krum Efremov, një nga diplomatët më cilësorë, sipas mendimit tim”, deklaroi Mucunski.

Për ambasadën në Athinë, ministri nuk dha detaje, duke theksuar se procedura ndodhet ende në një fazë ku informacionet konsiderohen të klasifikuara.

Sipas Ligjit për Punët e Jashtme, të paktën 50 për qind e ambasadorëve duhet të jenë diplomatë profesionistë, ndërsa plotësimi i vendeve vakante mbetet një nga detyrat që Ministria e Jashtme synon ta përmbyllë gjatë periudhës së ardhshme.

Mungesa e 11 ambasadorëve, e shoqëruar me përfundimin e afërt të mandateve të disa diplomatëve të tjerë, e vendos diplomacinë e vendit përballë një vale të re emërimesh.