Osmani kërkon rishikimin e vendimit “non grata”: Shqipëria duhet të mbetet derë e hapur për shqiptarët

Zyrtari i lart i BDI-së, Bujar Osmani, ka reaguar lidhur me shpalljen “non grata” nga Shqipëria të dy qytetarëve nga Çairi, duke e cilësuar çështjen si të ndjeshme dhe duke bërë thirrje për mirëkuptim nga të dyja palët.

Osmani tha se fillimisht nuk kishte ndërmend të komentonte rastin, por shtoi se nuk dëshiron të heshtë për tema të rëndësishme.

“Ka momente kur duhet të thuash atë që mendon, edhe kur tema nuk është e lehtë”, shkroi ai.

Sipas Osmanit, Shqipëria, si shtet sovran, ka të drejtë të marrë vendime për çështjet e saj të brendshme, ndërsa qytetarët e Maqedonisë së Veriut duhet të respektojnë sovranitetin e saj dhe të shmangin përfshirjen në përplasjet politike të brendshme.

Megjithatë, ai theksoi se Shqipëria duhet të kuptojë edhe ndjeshmërinë e shqiptarëve jashtë kufijve të saj.

“Për shumë shqiptarë të Maqedonisë së Veriut, Shqipëria nuk përjetohet si një shtet i huaj. E shohin si shtetin e kombit të tyre dhe debatin politik atje e përjetojnë si pjesë të hapësirës së tyre kombëtare”, u shpreh Osmani.

Ai vlerësoi se rasti mund të jetë rezultat i moskuptimit të këtyre dy realiteteve dhe shprehu bindjen se ekziston hapësirë për sqarim dhe për rishikimin e vendimit.

Në fund, Osmani theksoi se “Shqipëria duhet të mbetet një derë e hapur për shqiptarët kudo që jetojnë, ndërsa shqiptarët kudo që jetojnë duhet ta respektojnë Shqipërinë si shtet.” Gazeta Flaka