Plagosi kryeministrin sllovak/ Autori 71-vjeçar, në gjykatë në masa të forta sigurie

Autori i plagosjes së kryeministrit sllovak Robert Fico ka mbërritur në gjykatën penale për tu njohur me masën e sigurisë, në një seancë që pritet të zhvillohet nën masa të forta sigurie.

Prokuroria sllovake ka kërkuar arrestin me burg për 71-vjeçarin me akuzën e vrasjes me paramendim.

71-vjeçari, Juri Cintula ka mbërritur në  gjykatën penale në Pezinok për tu njohur me masën e sigurisë për tentim-vrasje të kryeministrit sllovak, Robert Fico.

Para gjykatës janë parë shumë forca policore, teksa e gjithë vëmendja është në gjendjen shëndetësore të kreut të qeverisë.

71-vjecari  ka qëlluar me armë Ficon, pas një takimi qeveritar të mërkurën. Prokuroria ka kërkuar masën “arrest me burg” për të dyshuarin për atentatin në tentativë ndaj kryeministrit sllovak, nën akuzën për vrasje me paramendim.

Cintula qëlloi në total pesë herë ndaj kryeministrit , ndërsa një prej plumbave e ka kapur në bark. Kryeministri ka qenë në afërsi të mbështetësve të tij, pas takimit qeveritar të zhvilluar në qytezën Handlova.

Kryeministri sllovak u transportua me helikopter në spital dhe iu nënshtrua një operacioni pesë-orësh, ndërsa të premten iu nënshtrua një tjetër operacioni dy orësh.

“Pacienti tani është i vetëdijshëm, gjendja e tij është e qëndrueshme, por është ende në Repartin e Mjekimit Intensiv”, deklaroi drejtoresha e spitalit ku po trajtohet Fico.