Prostitutat nga jashtë i josh Maqedonia e Veriut 

Prostitutat nga jashtë i josh Maqedonia e Veriut. Gjatë një aksioni policor në pesë lokacione në Shkup dhe Kumanovë u arrestuan 4 persona që ishin nën hetim si të dyshuar për ndërmjetësim në ushtrimin e prostitucionit dhe pastrim parash. E dyshuara kryesore është një shtetase braziliane me leje qendrimi të përkohshëm në Maqedoninë e Veriut. Ajo ka bashkëpunuar me dy shtetas të Maqedonisë së Veriut dhe dy persona të paidentifikuar nga Portugalia. Të dyshuarit organizuan rekrutim, transportim dhe strehim të grave nga Brazili, me qëllime përfitimi. Në periudhën prej gati një viti, ata kanë pranuar pesë gra nga Brazili të moshës 26 deri 38-vjeç, duke i strehuar në disa apartamente në Shkup.

“Gratë jepnin shërbime seksuale për klientët në këto apartamente, të cilët kontaktonin përmes një faqeje ndërkombëtare të internetit për eskorta në Evropë. Në këtë faqe, gratë kishin krijuar profile me numra telefoni, lista çmimesh për shërbime seksuale dhe shtesë, si dhe fotografi me përmbajtje eksplicite. E dyshuara kryesore kontrollonte profilet e tyre, kontaktonte klientët, organizonte oraret dhe caktonte kohëzgjatjen e shërbimeve, të cilat kushtonin nga 150 euro për gjysmë ore deri në 800 euro për një natë. Për shërbimet shtesë, çmimet fillonin nga 70 euro. Për organizimin dhe menaxhimin, ajo merrte 30% të të ardhurave, të cilat i ndante me dy të dyshuarit e tjerë që kujdeseshin për strehimin dhe sigurinë e grave”, thonë nga Prokuroria Themelore Publike.

Sipas prokurorisë, paratë e fituara janë dërguar jashtë vendit përmes sistemeve të transferimit elektronik dhe përmes portofoleve elektronike, pra me kriptomonedha.

“Për të fshehur burimin e të ardhurave të paligjshme, e dyshuara kryesore dërgoi 26,151 euro përmes një sistemi transferimi elektronik te katër persona në Portugali dhe tre në Brazil gjatë një viti. I dyshuari i dytë transferoi 3,000 dollarë në Norvegji dhe shuma të tjera për të mbuluar qiratë dhe shpenzimet ditore të grave. I dyshuari i tretë dërgoi 1,965 euro në llogarinë e të dyshuarës kryesore në Portugali dhe 150 euro në Kolumbi. I dyshuari i katërt, një klient i rregullt, krijoi një llogari elektronike për një nga gratë për të fshehur burimin e të ardhurave nga aktivitetet e paligjshme, duke i lejuar asaj të kryente transaksione përmes një portofoli elektronik (kriptomonedha)”, theksuan nga Prokuroria Themelore Publike.

Gjatë këtij aksioni u sekuestruan edhe pajisje telefonike, një laptop, dy armë zjarri, para në valutë vendase dhe të huaj si dhe dokumente. Prokurori ka paraqitur kërkesë për paraburgim për të katër të dyshuarit pranë Gjykatës Penale Themelore të Shkupit.