Spanja ndalon ankorimin e anijes që thuhet se po transportonte rreth 27 ton eksplozivë drejt Gazës

Qeveria spanjolle ka njoftuar se do të refuzojë kërkesat e çdo anijeje që transporton armë në Izrael dhe dëshiron të ndalet në portet spanjolle.

Siç raportohet, autoritetet spanjolle kanë refuzuar kërkesën e një anijeje që transportonte armë për Izraelin, të ankorohej në një nga portet e vendit.

“Kjo është hera e parë që e bëjmë këtë sepse është hera e parë që kemi zbuluar një anije që transportonte një dërgesë armësh në Izrael dhe dëshiron të hyjë në një port spanjoll”, tha Ministri i Jashtëm spanjoll, Jose Manuel Albares.

“Ministria e Jashtme do të refuzojë sistematikisht ndalesa të tilla për një arsye të qartë: Lindja e Mesme nuk ka nevojë për më shumë armë, ka nevojë për më shumë paqe”, shtoi Albares.

Ndryshe, anija me flamur danez, “Marianne Danica” u nis nga India drejt portit juglindor të Kartagjenës me 27 ton eksploziv, sipas gazetës spanjolle El Pais, shkruan euronews.

Bëhet e ditur se ky vendim i qeverisë së Pedro Sanchez vjen vetëm disa ditë pasi disa politikanë spanjollë i kërkuan qeverisë të ndalojë hyrjen e një anijeje tjetër, “Borkum”, për të cilën grupet pro-palestineze thonë se transporton armë në Izrael.

Mirëpo, Borkum e mori autorizimin e qeverisë për të ndaluar në Kartagjenë pasi thuhet se destinacioni i saj ishte Republika Çeke e jo Izraeli.

Shteti spanjoll ka ndaluar shitjen e armëve në Izrael dhe ka kritikuar ashpër ofensivën izraelite në Gazë.