VLEN shpreh bindje: Në zgjedhje të ndershme, BDI-në do ta dërgojmë në histori!

Koalicioni VLEN tha se, BDI nuk nxori mësim pasi sipas tyre, nëse zgjedhjet lokale dhe parlamentare mbahen bashkë, VMRO-DPMNE do të fitojë me mbi 60 deputetë. VLEN tha se, në zgjedhje të ndershme dhe demokratike, VLEN jo vetëm që do ta fshijë BDI-në nga harta politike, por më në fund do ta dërgojë aty ku e ka vendin prej kohësh, në histori!

“Vetëm të verbërit politik nuk shohin se nëse zgjedhjet lokale dhe parlamentare mbahen bashkë, VMRO-DPMNE do të fitojë me mbi 60 deputetë. BDI nuk nxori asnjë mësim. Përkundrazi, vazhdon ta forcojë VMRO-DPMNE-në me gënjeshtra për kinse “deshqiptarizim”, duke frikësuar popullin e vet me përralla boshe. Por shqiptarët nuk janë naivë! Ata e dinë fare mirë që “Qeveria e Përzhinës” i duhet BDI-së vetëm për një arsye: për të shpëtuar krimin e Ali Ahmetit dhe për të fshehur dosjet që po i dalin përditë!

Sot, BDI ngjan me një nxënës të trembur që ka harruar detyrat e shtëpisë dhe vrapon nga një cep në tjetrin duke kërkuar shpëtim, sepse e di mirë që pa kontroll mbi MPB-në dhe institucionet shtetërore nuk është asgjë. Por koha e shantazheve ka përfunduar! Në zgjedhje të ndershme dhe demokratike, VLEN jo vetëm që do ta fshijë BDI-në nga harta politike, por më në fund do ta dërgojë aty ku e ka vendin prej kohësh, në histori”, tha VLEN.