Përjashtohen deputetët e ASH-së nga komisionet kuvendore –emërohen përfaqësues të VLEN-it!

Në seancën plenare të Kuvendit të Maqedonisë së Veriut që do të mbahet sot, pritet të miratohen propozim-vendimet e djeshme të Komisionit për Zgjedhje dhe Emërime, me të cilat deputetët e Aleancës për Shqiptarët të udhëhequr nga Arben Taravari do të përjashtohen nga përbërja e komisioneve kuvendore – si anëtarë dhe zëvendës-anëtarë, shkruan Flaka Media

Në vend të tyre, do të emërohen deputetë të koalicionit VLEN, i cili tashmë përfaqëson pjesën tjetër të Aleancës për Shqiptarët që ka hyrë në shumicën e re qeverisëse.

Përbërja e komisioneve në Kuvend përcaktohet sipas përfaqësimit proporcional të grupeve parlamentare, varësisht nga numri i deputetëve që ka secili subjekt politik. Me ndryshimet në përbërjen e shumicës dhe realinjimin e deputetëve shqiptarë, kjo lëvizje vjen si pasojë e përditësimit të balancës së re politike në Kuvend.

Ky zhvillim përforcon pozicionin e VLEN-it në legjislativ, ndërkohë që e dobëson më tej ASH-në e Taravarit, e cila tashmë ndodhet në opozitë. Flaka Media