22 denarë për kilometër, më lirë se taxi! Shërbimi “Car sharing Avant2go”

Zv/kryeministri Izet Mexhiti dhe Ministrja për Energjetikë në Qeveri erdhën me makinë elektrike. Këto makina nga qershori do të jenë në dispozicion të qytetarëve dhe janë pjesë e shërbimit të parë të ndarjes së makinave plotësisht elektrike Car Sharing Avant2Go në vendin tonë. Veturat i provuam edhe ne.

“Nëse doni të merrni me qera një veturë të këtillë elektrike, kilometri do të ju kushtoj 22 denarë, ndërsa minuti 6 denarë, në dispozicion janë 100 vetura , në 40 deri 60 lokacione”, raporton Almedina Ismajli, gazetare e TV21.

Përdorimi i automjeteve plotësisht elektrike do të thotë zero emetime të gazrave të dëmshëm, gjë që kontribuon drejtpërdrejt në uljen e ndotjes së ajrit, veçanërisht në zonat urbane. Automjetet elektrike janë dukshëm më të qeta se automjetet klasike, dhe sipas standardeve botërore, një automjet Car-Sharing zëvendëson 10 deri në 15 automjete private, theksoi Zv/kryeministri Izet Mexhiti.

Ministrja për Energjetikë Sanja Bozhinovska tha se car sharing është më ekonomike se taksi, andaj ia rekomandoi studentëve.

Themeluesi i projektit Avant2Go Matej Cer tha se për dy tre vite në Maqedoni do të ketë deri në 1.000 makina elektrike në shërbim të qytetarëve, edhe atë edhe nëpër qytetet e tjera.

Avant2Go është një shërbim i car-sharing që ofron vetura 100% elektrike për përdorim të përkohshëm. Përdoruesit mund të rezervojnë dhe përdorin veturat për periudha të ndryshme kohore, duke paguar vetëm për kohën e përdorimit. Automjetet janë në pronësi të kompanisë Avant2Go Car-Sharing – Macedonia, dhe do të mund t’i siguroni me një aplikacion, i cili mund të shkarkohet duke filluar nga sot.